"Agarda bugun g'alaba qozonganimizda imkoniyatlarimiz oshar edi. Uch kun oldin og'ir o'yin o'tkazgan edik. Futbolchilarni ruhiy va jismoniy tomongan tayyorlashga harakat qildik. Ularda g'alaba uchun ishtiyoq katta edi. Uchashuvni yaxshi boshladik, bo'lim o'rtalarida ustunlikni raqibga berib qo'ydik. Standart vaziyatlar bizning joriy mavsumdagi eng ojiz nuqtamiz bo'lib qoldi. Ko'p gol o'tkazib yuboryapmiz.

Hujumga yakuniy nuqtani qo'yish ustida mashg'ulotlarda ishlayapmiz. Zich himoyani yorib o'tishda mahorat talab etiladi. Bunday paytda tezroq o'ynash kerak. Tez harakat qilish, tez fikrlash ustida ko'p ishlashimiz kerakligi sezilib qolyapti.

Birinchi o'tkazib yuborilgan golda himoyachilar aybdor edi. Raqib to'p uzatadi, kim birinchi bo'lib etib kelsa imkoniyatdan foydalanib gol uradi. Bu erda yarim metr ham rol o'ynaydi. Qisqa vaqt ichida futbolchilarni tiklashga harakat qildik, mana bugun Salohiddin Sanoqulov hali tayyor emasligi ko'rinib qoldi. U hali yosh futbolchi, Pro ligada ilk bor to'p tepyapti. Yoshlarni qo'llab-quvvatlaymiz. Keyingi o'yinga tiklanishga vaqtimiz etarlicha bo'ladi deb o'ylayman.

Superligaga chiqish imkoniyati haqida mavsum boshida ham aytib o'tganman. Men mashg'ulotlarni olib boraman, futbolchilarning saviyasini yaxshi bilaman. Raqiblarni o'rganamiz. Maydonda katta jismoniy hajmdagi ishni bajaradigan va jamoani ortidan ergashtira oladigan futbolchi bizda etishmaydi. Bitta narsani aytishim mumkin, biz har bir o'yinda oxirigacha kurashamiz. Faqat shu tomonlama nimagadir erishishimiz mumkin. Superligaga chiqish yoki chiqmaslikni bilmadim, lekin oxirigacha kurashamiz.

Samandar Shodmonov faoliyatini yakunlash borasida o'zi qaror qabul qiladi. Tezkor futbolga jismoniy kuch kerak. Bu futbolchiga yosh tomonlama ham og'irlik tug'diradi. Qaysidir o'yinlarga bizga yordam berishi mumkin. Lekin bugungidek yuqori saviyadagi jamoalarga qarshi bellashuvlarda Samandarga qiyin bo'ladi. Imkoniyati darajasida harakat qiladi. Jamoani g'alabasi uchun borini beradi deyishim mumkin",- deydi Asror Aliqulov.

Asror Aliqulov: "Superligaga chiqish yoki chiqmaslikni bilmadim, lekin oxirigacha kurashamiz"