"Барча "Жайҳун" мухлисларини ғалаба билан табриклайман. Уч очко сув ва ҳаводек зарур эди. Сўнгги икки ўйинларда кўнглимиз тўлмаётганди. Шу боис бугун ютмасак бўлмасди. "Олимпик Мобиуз"ни яхши билардик, шу пайтгача 3 маротаба тўқнаш келгандик. Йигитларга ғалаба зарурлигини айтгандим. Аввалги ўйинларни унутиб бошқача тайёргарлик кўрдик. Рақибни ўрганиб чиққан ҳолда ўйинларни таҳлил қилдик. Ўйинга келсак, назорат жамоамиз томонда бўлди. Рақиб дарвозасига тўплар киритилди. Голларни керакли вақтда урдик. "Олимпик Мобиуз"ни яхши биласизлар. Таркибида терма жамоа футболчилари бор. "Локомотив" билан кечган ўйинларини томоша қилдик, ҳар бир футболчи ўрганилди. Рақиб 2 та голни ўз хатоларимиздан сўнг уриб кетди. Умуман олганда жамоамдан мамнунман",- дейди Айбек Нурбаев.

- Асадулла Кутибаевни захирага олиниши нима билан боғлиқ?

- Асадулла ёзги йиғинимизда қатнаша олмади. Жароҳатдан қайтди. Секин-аста жамоамизга қўшилиб борди. Ўйин амалиёти беряпмиз. Бугун ротация қилмасак бўлмасди. Қайсидир маънода таваккал қилдим. Асадулла тўлиқ спорт формасида эмас. Олдинда ўйинларимиз бор. Асадулла ўзини кўрсатади деб ўйлайман. Режам бўйича уни бир тайм кўриб олмоқчи эдим. Ёмон ўйнамади, бироз жисмоний томондан оқсади.

- Голдан сўнг орқага ўтириб қолдик...

- Бу табиий ҳолат. Балки ёш, балки тажрибасизлик етишмади. Ғалаба қозондик деб ўйлашади. Ўйиндан-ўйинга кучайиб боришимиз керак. Бу йигитлар келажакда Суперлигада, терма жамоада ўйнашади.

- Биринчи даврада гол уришга қийналган бўлса, иккинчи даврада гол ўтказмасликда муаммога учрамоқда...

- Бу тажриба билан боғлиқ. Ҳар бир позицияда муаммоларимиз бор. Бегис Куанишбаев ўзини кўрсатди. Буни таъкидлаш зарур.

Айбек Нурбаев: "Олимпик MobiUz"ни яхши ўрганган эдик"