- O'yin haqida

- Gapning ochig'i, bugungi o'yinda alamli durang natija qayd etildi. Uchrashuv oxirigacha g'alabani saqlab qolish uchun bizga tajriba etishmadi. O'yin oxirida tempni tushirib, to'p nazoratini qo'lga olish o'rniga raqibga hujum tashkil etish uchun imkon berib qo'ydik. Birorta futbolchimiz bu borada harakat qilmadi. Biz bilan o'yinda ayrim jamoalar g'alabani ushlab qolish uchun maydonda "yotib oladi". Shu kabi mayda sabablar tufayli tayyor g'alabani qo'ldan chiqardik. "Mashal"ning harakatlariga ham ko'z yumish kerak emas, ular oxirigacha kurashdi.

- Anvar Hojimirzaev va Ilhom Vahobovning harakatlariga qanday baho berasiz?

- So'ngi vaqtlarda bizda jarohat olgan futbolchilar ko'payib bormoqda. Jumladan, Murod Xolmuhammedov jarohat oldi, Farhod Bekmurodov o'yinga tayyor emasdi. Shu sabab tarkibda o'zgarishlarga qo'l urdik. Bir xil tarkib bilan o'ynashga imkon bo'lmayapti. Ular yaxshi taasurot qoldirishdi. Futbolda shunaqa, futbolchi uchun o'yin imtihondek gap. O'zingni ko'rsat va asosiy tarkibga kir. Shu sababli hammada imkoniyat bor, o'zini ko'rsatganlar, jonini berib o'ynaganlar keyingi o'yinda ham asosiy tarkibdagi joyini kafolatlashi mumkin.

Bugungi o'yinda "Mashal"ning imkoniyatlari standart vaziyatlarda bo'ldi. Ular burchak zarbasidan so'ng xavfli vaziyatni yuzaga keltirishdi. O'yindan oldin raqibni o'rganganmiz. Xatto har bir futbolchi uchun alohida o'yinchimizni biriktiramiz. Xavfli vaziyat bartaraf etilmaguniga qadar o'ziga biriktirilgan futbolchi uchun javobgar bo'ladi. Negadir etiborsizlikka yo'l qo'ydik, standart vaziyatlarda raqibga gol urish imkoniyati berib qo'yildi. "Bunyodkor" bilan o'yinda ham standart vaziyatda 2 ta gol o'tkazib yuborgandik. Balki o'yin oxirida vaqtni cho'zishimiz kerakmidi?! Uyda ochko yo'qotsak, yuqori o'rindagi jamoalarga etib olish qiyin bo'ladi.

- Murod Xolmuhammedov keyingi o'yinda maydonga tushishi mumkinmi?

- Yo'q, Xolmuhammedov hali umumiy mashg'ulotlarga kirishgani yo'q. Keyingi o'yingacha vaqt kam, tayyor bo'lmasa kerak. Barcha jarohat olgan futbolchilarimiz tezroq sog'ayib safimizga qo'shilishini tilab qolamiz.

Baxtiyor Ashurmatov: "Biz bilan o'yinda ayrim jamoalar g'alabani ushlab qolish uchun maydonda "yotib oladi"