Jamoa safida ko'p yillardan buyon o'ynab kelayotgan futbolchilar xizmatidan voch kechilayotgani ko'pchilik mahalliy muxlislarni ham o'yga toldirmoqda. Dastlab kutilmaganda, Sanjar Asqaraliev bilan xayrlashgan farg'onaliklar shundan hech qancha vaqt o'tmay, Baxtiyor Yoqubov bilan ham hamkorlik qilishni to'xtatdi. "Neftchi" tarkibida 2004 yildan buyon o'ynab kelayotgan Yoqubovning joriy mavsum ham farg'onaliklar tarkibida o'ynashi tahmin qilinayotgandi.

- Baxtiyor aka, oxirgi paytlarda "Neftchi"ning etakchi o'yinchilari tark etayotgan bo'lishiga qaramay, ko'pchilik bu yil ham sizning "Neftchi"da qolishingizga umil qilayotgandi. Ammo voqealar rivoji bunday tus olmadi. O'zingiz uchun qadrdon bo'lib qolgan jamoani tark etishingizni hamma turlicha izohlamoqda. Vaziyatni o'zingiz tushuntirib bersangiz. Aslida nima yuz berdi?
- Bunday bo'lishini to'g'risi ham sira kutmagandim. Afsuski "Neftchi"ni tark etishga majbur bo'ldim. Hammasini bir boshdan aytib beradagan bo'lsam, o'tgan mavsum yakunlangach klub rahbariyati bilan keyingi taqdirim haqida gaplashganimda, jamoaga kerak ekanligimni aytgandi. Bu paytda oliy liganing bir qator klublaridan qiziqarli takliflar kelib tushayotgandi. Lekin "Neftchi"ga kerak ekanligimni xis etgach, barcha chorlovlarni rad etdim. Yaqinda ham Komil aka Mirzaboev yangi shartnoma tuzish borasida hammasini kelishib olgandik. Lekin ayrim sabablarga ko'ra, bitim imzolanishi 3-4 kunga qoldirildi. 7 fevral kuni esa rahbariyat bilan shartnoma borasida gaplashgani xonasiga kirsam, murabbiylar shtabining qaroriga ko'ra men bilan hamkorlik qilmaslikka qaror qilishganini malum qildi…

- Bu borada bosh murabbiyning o'zi bilan alohida suhbatlashdingizmi?
- Shunday qildim. Darhol buning sababini bilish maqsadida Murod akani oldiga kirib fikrini bilishga qiziqdim. Shunda u kishi murabbiylar kengashi bilan shunday qarorga kelishganini aytdi. Keyin qo'shimcha tarzda menga tez-tez jaroxat olib, safdan chiqayotganimni aytib, sening davolanib yurishingni qachongacha kutamiz qabilida fikrlarni ilgari surdi. Bu paytga kelib shokka tushib qoldim. Chunki "Neftchi"ni shu tariqa tark etaman deb sira o'ylamagandim. Men ularga ishonib, boshqa takliflarga rad javobini berib kelayotgandim. Ular meni huddi ko'chaga tashlab ketgandek tuyuldi. Bu yil ham "Neftchi" safida o'ynab jamoaga foyda keltirishni maqsad qilib, yaxshi niyat qilib yurgandim. Ammo kutilmagan zarba meni shokka tushirib qo'ydi. Ishonasizmi haligacha "Neftchi"dan ketganimga o'zimni ishontira olmayapman. O'n yil o'ynadim. Tabiiyki bog'lanib, ko'nikib qolgandim.

- Bungacha Murod Ismoilov bilan munosabatingiz qanday edi?
- Murod akani haligacha hurmat qilaman. O'zimni huddi akamdek ko'raman. Birinchi murabbiyim desam ham bo'ladi. "Neftchi"ga bosh murabbiy bo'lib kelgach, birga suhbatlashgandik. Shunda ham u kishi menga jamoada qolishim kerakligini aytgandi. Xohlaysizmi yo'qmi klubda bosh murabbiy o'zgargach, bu hamma o'yinchiga har hil tasir qiladi. Kimgadir yoqadi yana kimgadir aksincha. Biroq Murod aka kelgach, ko'pchilik xursand bo'lgandi. Buni o'ziga ham futbolchilar nomidan aytgandim. Tajribali o'yinchi sifatida yoshlarga yordam berishim zarurligini uqtirgandi. Marg'ilonlik bo'lganim uchun Ismoilov meni yoshligimdan yaxshi biladi. Boz ustiga "Cementchi"da birga o'ynaganmiz. Yil boshida keraksan deb turib, bugunga kelib, ketaver deyishini haligacha hazm qilishim qiyin bo'lmoqda. O'zimga ham bu borada ko'p savol berib ko'rdim. Lekin nima uchun bunday qilishganini tushuna olmadim. Shu o'rida bitta bo'lgan voqea yodimga tushdi. "Neftchi"ga kelishim aynan Murod Ismoilov bilan bog'liq. Yani u kishi 2004 yili marg'ilonlik yoshlardan iborat jamoa tuzib, "Neftchi" bilan o'ynatgandi. Mazkur uchrashuvdan so'ng Yuriy Sarkisyan meni Farg'onaga olib kelgandi. Demoqchimanki, bunda Murod akaning o'rni katta bo'lgan. (Kulib) Taqdirning hazilini qarang, yillar o'tib endi u kishi mening jamoaga kerak emasligimni bildirib, ketishimni aytmoqda.

- Jarohatni qachon olgandingiz?
- O'tgan yili jarohat olib, ikkinchi davrani asosan shu tufayli barqaror o'tkaza olmagandim. Lekin hozir yaxshi. Mashg'ulotlarda ham bor kuchim bilan ishladim. Faqat yaqinda Hokim Kubogi-2014 turniri davomida qorli va shu bilan birga suniy maydonda o'ynaganimiz uchun shekilli, oyog'imda ozgina og'riq paydo bo'la boshladi. Aslida bu jiddiy emasdi. Jarohat olgan bo'lsam, ko'chada orttirib olganim yo'q. Shu Neftchi uchun o'ynayotganda, maydonda olganman-ku!

- Sizdan sal oldin "Neftchi" Sanjar Asqaraliev bilan ham hayrlashgandi. Nima uchun bunday qilinmoqda deb o'ylaysiz?
- Bilmadim, balki murabbiylar tarkibni yoshartirishni o'ylayotgandir. Lekin shuni unutmaslik kerakki, yoshlar bilan bir qatorda tajribali o'yinchilar ham kerak. Yoshlar aynan kattalardan o'rganadi deyishadiku. Ismoilovga haligacha g'arazligim yo'q. U kishining keyingi ishlariga omad tilayman. Lekin bunday xayrlashishini kutmagandim. Rosti, undan oldin ishlagan Amet Memet ham hurmatimni joyiga qo'ygandi. Murod aka esa mening yoshligimdan taniydi.

- Yangi mavsum start olishiga ham bir oy vaqt qoldi. Endi taqdiringizni qaysi jamoa bilan bog'lamoqchisiz?
- "Neftchi"dan ketganimni "Buxoro" rahbariyati internet orqali bilgan shekilli, yana menga ular taklif bilan chiqdi. Shuning uchun yakshanba kuni Buxoroning Toshkentdagi yig'iniga kelib qo'shildim. Hozircha hech narsa aniq emas. Faqat mashg'ulotlarda ishtirok etyapman xolos. Shartnoma borasida hali beri stol atrofida o'tirib gaplashib ko'rmadik.

- Bungacha asosan Farg'ona jamoalarida o'ynagan Yoqubov endilikda uyidan uzoqroqda o'ynashga majbur. Bunga tayyormisiz?
- Baribir "Neftchi"ga o'rganib qolgandim. Lekin hayot davom etadi. Ilgari boshqa viloyat jamoasida o'ynamaganim uchun ham bu menga boshqacha tasir qilmoqda. Balki bu xol keyinchalik izga tushib ketar. Bilasizmi "Neftchi"dan ketganimni oilamdagilarga dushanba kuni aytdim. Ungacha bu haqda hech kimga og'iz ochmadim. Chunki o'zim ham bunga ishonmay yurdim. Yaqinda akalarim Toshkentda "Buxoro" mashg'ulotlariga qo'shilganimni eshitib, ular ham xayron qoldi. Chunki ular ham mening Murod aka bilan munosabatim yaxshiligini bilardi. Mayli, hammasi yaxshilikka bo'lsin. Fursatdan foydalanib, "Neftchi"ga keyingi faoliyatida omad tilayman. Farg'onalik muxlislarga ham minnatdorchilik bildiraman.

Islombek RUSTAMBEKOV suhbatlashdi.

Baxtiyor Yoqubov: "Neftchi"ga kerak emasligimni eshitgach, shokka tushib qoldim"