Аслида Жейми А Серияга Дель Пьерога бўлган муҳаббати туфайли кўчиб ўтган ва энди топ-клублар дарвозасини ишғол этмоқда.

А Серия қария футболчилар учун севимли топ-лига десак, муболаға бўлмайди. Бу ерда паспортингизга қарашмайди — ва "қариялар" аксар вазиятларда ёшларга "дарс" ўтиб қўйишади. Тахминан 40 ёшларгача Италияда кўплаб афсоналар тўп тепган: Златан Ибрагимович, Фабио Квальярелла, Лука Тони, Франческо Тотти, Паоло Мальдини, Алессандро Костакурта. Ҳозир Лука Модрич "Милан"ни чемпионликка етакламоқда. Шу сабабли Жейми Варди бироз сояда қолиб кетаётгандек. Бунга қарамай, англиялик футболчи ҳам ажойиб ўйин кўрсатмоқда ва эътирофга муносибдек.

Варди қандай қилиб "Кремонезе"га бориб қолди? Уни ҳатто "Наполи" ўз таркибига чорлаганди

Жеймининг "Лестер"дан кетиши ҳақида апрель ойи охирида маълум қилинди, айнан ўшанда клуб Чемпионшипга тушиб кетиши аниқ бўлиб улгурганди. "Ушбу мавсум охирида, таркибимизда 13 мавсум тўп тепган ва клубимизнинг энг буюк футболчисига айланган, ҳужумчи бизни тарк этишини тасдиқлаймиз"", — дейилганди Англия экс-чемпионлари хабарида Варди ҳақида.

Чиндан ҳам ўзига хос ҳикоя : завод ишчиси ва етти даражали лигадан Премьер-лигагача етиб бориб, унинг нафақат чемпиони балки энг яхши футболчисига айланди. Топ-клубларнинг таклифларига қарамай, афсонага айланган клубига содиқ бўлиб қолаверди. Варди саргузаштлари, фаолияти ҳақида фильм ишласа арзийди, лекин унга қизиқарли финал етишмаётганди — англиялик 38 ёшда ҳам бутсаларини михга илгани йўқ.

Ёзда Жейми трансфери ҳақида Голливуд актёри Райан Рейнольдснинг Чемпионшип йўлланмасини қўлга киритган клуби "Рексем" орзу қилганди. Бироқ футболчи томонидан олиб қарасак, ушбу лигада яна "Лестер"га қарши тўп тепишдан маъно борми? Бундан ташқари яна қатор қизиқ миш-мишлар бор эди: "The Telegraph" ҳужумчига "Арсенал" қизиқаётганини ёзса, "Daily Mail" Варди "Наполи"да пайдо бўлиши мумкинлигига ишора қиларди — жароҳатланган Ромелу Лукакунинг ўрнига.

Амалда эса неаполликлар Расмус Хойлундни қўлга киритишди, Варди Италияга, аммо камтарроқ клубга йўл олди. Жейми "Кремонезе" билан 1+1 кўринишдаги шартнома имзолади.

А Серия дебютанти қандай қилиб, ёши анча ўтиб қолган бўлсада, номдор ҳужумчини кўндира олди? Бунда бош мураббий Давиде Николанинг ва ҳайрон бўлманг, Алессандро Дель Пьеронинг улуши катта. Ҳа, афсонавий "ювентини" "Кремонезе" сафида тўп тепмаган, лекин англияликда Италия футболига муҳаббат уйғота олган.

"Таклифларини рад этган клублар номини айтмайман. Барчасини ўйлаб кўриб, оилам билан маслаҳатлашиб, қарор қабул қилдим ва бахтлиман. Бу вариант ҳақида гаплашганимизда мен кўплаб факторларни инобатга олдим: энг аввало оилам фикри. Бу вазиятда технологиялар ҳам ёрдам берди: тахминан 45-60 дақиқа видео-алоқа орқали суҳбатлашдик ва у мени ишонтира олди. Мен мураббийга керак паллада ёрдам бера олиш учун меҳнат қиляпман. Италия ва кумирим ҳақида ўйласам, Дель Пьерони ёдга олавераман. Болалигимда унинг ўйинларидан завқланардим", — дея Варди сўзларидан иқтибос келтиради "Sky Sports".

"Келишувни амалга ошириш имкони борлигини тушунганимизда унга вазиятни қандай кўраётганимизни маълум қилдик. Унинг реакциясини кўриш ва айнан бизни танлаши жуда муҳим эди. У ҳали ҳам ғалаба қозонишни истайди", — деганди Никола "Football Italia" нашрига берган интервьюсида.

Янги чемпионатга мослашиб олган Варди грандларни ранжитишни бошлади

Трансфер ҳақида 1 сентябрь санасида маълум бўлди, шу сабаб Жейми фақатгина А Сериянинг 3-турида дебют қила олди. Қўшимчасига мавсумолди тайёргарлик кўнгилдагидек бўлмагани туфайли захира футболчиси сифатида бошлади: "Верона" ва "Интер"га қарши учрашувларда ярим соатдан сал кўпроқ ҳаракат қилди, "Комо"га қарши баҳсда захирада қолди, "Парма" билан беллашувни мушаклардаги муаммо туфайли ўтказиб юборди.

Кейин эса клублар футболида танаффус юзага келди ва ундан сўнг Варди – алиштириб бўлмас футболчига айланди: январда 39 ёшни қарши оладиган йигит қаторасига 4 та ўйинни тўлиқ ўйнади! "Удинезе" ва "Женоа" киперларини ранжитиш насиб қилмади, лекин топ-клублар ундан азият чекишди.

"Аталанта" (1:1) Жейми Вардини эътибордан қочирди ва у Алессио Зербин бошлаган ишни якунлаб қўйди. Тўғри, буни: "нима бўлибди, бўш қолган дарвозага тўпни йўллабди, нима қийин?" дейиш мумкин. Бироқ керакли вақтда керакли жойда бўлиш ҳам ўз-ўзидан бўлмайди.

"Ювентус" дарвозасига урилган гол эса бирмунча чиройли чиқди. Варди тўп учун курашда Федерико Гаттидан устун келди, катта тезликда олдинга ташланиб, узоқ бурчакни аниқ нишонга олди. Туринликлар якунда барибир (2:1) ғалаба қозонишди, лекин охирги дақиқалар қизиқарли бўлишини англиялик таъминлай олди.

Жейми, биринчидан, 1,2 xG кўрсаткич билан 2 та гол уриб улгурди. Иккинчидан, XXI асрда А Серияда гол урган 13-энг ёши улуғ футболчига айланди. Бу борада қаҳрамонимиз Филиппо Инзаги ва Антонио Ди Наталедек футболчиларни ортда қолдирди. "Динозаврлар"нинг бу рейтингида тўртинчи — Лука Модрич.

"Сиз, чамаси, менга ишонмаганлардан бирисиз. Бу фикрингиз хато эканлигини исботлашимга тўғри келади. Мен учун ёш — шунчаки рақамлар. Оёқларим аввалгидек ишлаб тураркан, мен футбол ўйнайвераман. Ҳозирда ҳеч қандай муаммони кўрмаяпман, демак, клуб манфаати йўлида боримни бераман. Италянчани ўрганаман, аммо ҳозир бу муаммо эмас: футболнинг ўз тили бор — тўп тили", — деди Варди "BBC"га. Чиндан ҳам, унинг фикрига қарши чиқиш мумкинми?

Дарвоқе, Жейми Варди гол урган "Ювентус" ҳақида мана бу мақолани ўқишни тавсия қиламиз:

"Ювентус"да яна "янги мураббий" операцияси — Спалетти бор вариантлар ичида энг зўри!

"Atalanta Oggi"га берган интервьюсида эса у АПЛ ва А Серияни солиштирганди: "Мураббий Никола сўраганда майдонга тушишга тайёрман. Ўзимни ажойиб ҳис қиляпман ва доимо яхши спорт формасида бўлишни истайман. Сизнинг лигангиз тактикага кўпроқ таянганади ва тўпга эгалик қилишга қаратилган. Премьер-лигада тезлик ва интенсивлик кўпроқ. Охир-оқибат футбол — бу шунчаки: сен 100% кучингни берадиган ўйин".

Ўзи "Кремонезе" қандай жамоа? Варди жамоадошларидан бири — Бенито Муссолинининг чевараси

Бундан аввал "Кремонезе" А Серияда уч йил аввал иштирок этган ва бор йўғи 19-ўринни банд этган. Ундан аввалгиси эса — 1996 йилда бўлгани эътиборга лойиқ. Клуб тўртинчи дивизионгача тушиб кетган даврлар ҳам бўлган. Европада клуб ҳақида фақатгина "Football Manager" ўйини орқали билишган десак, муболаға бўлмайди. Айнан Вардининг трансферидан кейин Кремона шаҳри вакиллари ўзлари ҳақларида гапиришга мажбур қила олишди.

Жейми клубга келгунига қадар "Кремонезе" сафарда "Милан"ни мағлубиятга (2:1) учратди, кейин эса ўз майдонида "Сассуоло"ни ҳам енга олди (3:2). Ҳа, қолган саккиз ўйинда жамоа бор йўғи 1 та ғалабани қўлга кирита олди — "Женоа" таслим этилди (2:0). Бироқ мағлубиятлар ҳам бор йўғи иккита — "Ювентус" (1:2) ва "Интер"дан (1:4). 10-турдан кейин жамоа дебютант учун ёмон бўлмаган 10-поғонани банд этиб турибди. Жадвалга қараркансиз "Аталанта", "Сассуоло", "Торино" ва "Женоа" каби номдорроқ клубларни "Кремонезе"дан пастда кўрасиз!

"Transfermarkt"да "Кремонезе"нинг умумий нархи 77,15 млн еврога баҳоланади — фақатгина "Лечче"нинг нархи (€ 75,4 млн) унданда пастроқ. Солиштириш учун "Парма", "Удинезе" ва "Торино" ҳам жадвалнинг қуйи қисмидан ўрин эгаллаган. Бироқ ҳаттоки уларнинг ҳам таркиби камида € 148 млнга баҳоланмоқда.

"Кремонезе"да юлдуз битта. Шунга қарамай, номдор футболчилар етарли

28 ёшли дарвозабон Эмиль Аудеро — "Сампдория" афсонаси, вақтида "Интер" шарафини ҳимоя қилган, ҳозирда эса "Комо"дан ижарага олинган. Олти ўйинда 5 та гол ўтказиб юборган дарвозабон 3 учрашувда дарвозаси дахлсизлигини сақлаб қола олган.
Диктатор Бенито Муссолинининг чевараси — "Лацио"дан ижарага олинган 22 ёшли ўнг қанот ҳимоячиси Романо Флориани Муссолини. У шунингдек ярим ҳимоя қанотларида ҳам ҳаракат қила олади, А Серияда 8 та учрашувда майдонга тушиб улгурган. Бу футболчининг элитадаги дебют мавсуми.
Етти ўйинда 4 та гол урган 28 ёшли ҳужумчи Федерико Бонаццоли. Сиз "Интер" академияси тарбияланувчисини "Салернитана", "Сампдория" ва "Верона" клублари сафидаги ўйинлари орқали эслашингиз мумкин.
Ҳимоя чизиғидаги чинакам қўрғон 29 ёшли "качок" ҳимоячи Федерико Баскиротто. У жорий мавсумнинг 10 ўйинида 2 та гол уришга ҳам улгурди. "Милан"дан ижарага олинган 22 ёшли номинал ўнг қанот ҳимоячиси Филиппо Терраччанода ҳам худди шунча (2) гол бор. Федерико ва Филиппо марказий ҳимоя учлиги вакиллари ҳисобланади.
Жамоанинг асосий ассистенти — 29 ёшли бельгиялик хавбек Яри Вандепутте. Охирги йилларда В ва С Серия жамоалари сафида ҳаракат қилган Яри бу мавсум 10 та ўйинда майдонга тушган ва 4 бор шерикларига голли узатма етказиб берган.

Кремона жамоаси Жеймига қарши ҳужумларга таянган ўйин услуби билан ҳам, статус борасида ҳам мос клуб. Тўғри, "Кремонезе" янги "Лестер" бўлиши нереал вазифа. Шундай бўлсада, англияликнинг тажрибаси жамоага катта ёрдам бермоқда — Вардининг ўзи ҳам майдондаги ҳаракатлари билан уни ҳисобдан чиқаришга ҳали эрта эканлигини исботламоқда.

Бугун "Кремонезе" сафарда А Серия 11-тури доирасида "Пиза" қарши майдонга тушади. Нима деб ўйлайсиз, Варди рақиб дарвозасини ишғол эта олармикин?

Омонжон Тўхтамирзаев тайёрлади

Бенито Муссолинининг чевараси билан тўп тепаётган Жейми Варди Италияда футболдан завқ олмоқда