"3 oylik tanaffusdan keyin ikkala jamoa ham shiddatkor, mazmunli o'yin ko'rsatdi. "Navbahor" barcha o'yinlarda qarshi hujumlarda o'ynayotgan edi. Buni kutgandik. Shunga qaramay qaerdadir etiborni yo'qotdik, ikkita qarshi hujumda gol o'tkazib yubordik. Jamoam oxirigacha kurashdi. Raqibdan jismoniy tomonlama ustunlik qildik. Hozirgi holatimizdan kelib chiqib yomon o'ynamadik.

Albatta musobaqa jadvalida birinchi o'rinda turish doim yoqimli. Bu o'rinni saqlab qolishga harakat qilamiz.

O'zgarishlar o'zini oqladi deb o'ylayman. Murod Xo'jamberdiev va Husayin Norchaev debyut qilishdi. Kichik jarohati bor bo'lsa-da Xaris Dilaverni tavakkal qilib hujumkorlikni kuchaytirish uchun maydonga tushirdik. Xaris asosan o'z mamlakatida to'p tepgan, Marko Stanoevich esa ko'plab chet el klublarida o'ynagani uchun bizning jamoaga tezda moslashib ketdi.

Muxlislar ushbu bahsni markaziy deb hisoblashgandi, menimcha TV orqali tomosha qilgan muxlislar xursand bo'lishdi.

Dilshod Saitov jarohat olgan va davolanmoqda. Bu biz uchun katta yo'qotish.

"Navbahor" jamoasidan biz kutmagan variantlarni ko'rmadik. Tarkibi ham, o'ynash uslubi ham bir xil. Himoyada yaxshi himoyalanishdi.

Bizning rejamiz har bir o'yinda maydonga tushib, g'alaba qozonish. Bugun qanotlardan ko'proq urg'u berishga urindik. Muhitdinov va Mannonovni o'ynatdik, ularda vaziyatlar bo'ldi, ammo foydalana olmadik.

Karantin keyingi turlarga tasir qiladi albatta. Jamoalarda jarohat olganlar ko'paymoqda. Bundan tashqari kutilmagan natijalar ham qayd etilmoqda.

Futbol muxlislar uchun o'ynaladi. Stadionga muxlislar kelsa o'yin saviyasi va darajasi boshqacha bo'ladi. Hozir og'ir davrni boshdan kechirayapmiz, sabr qilish kerak", - deydi Ro'ziqul Berdiev.

"Birinchi o'rinni saqlab qolishga intilamiz, bugungi o'yindan oldin tarkibimizda jiddiy yo'qotish bor edi, "Navbahor"dan ustunlik qildik". Ro'ziqul Berdiev ishtirokidagi matbuot anjumani