Bu o'yinda xorazmliklar safida har ikkala gol Bobur Farhodov hisobiga yozildi. Uchrashuvdan so'ng Farhodov bilan suhbatlashdik.

G'alaba xususida

- Mazkur uchrashuv oldidan murabbiyimiz tomonidan berilgan ko'rsatmalarni bajarishga harakat kildik. G'alaba yo'lida maydonda borimizni berib o'ynadik. Aslida birinchi bo'limning o'zida ko'p gol urishimiz mumkin edi. Afsuski, yaratilgan imkoniyatlarimizdan foydalana olmadik. Shu o'rinda “Yangier” ham ikkinchi bo'lim oxirida hisobni tenglashtirishi mumkin edi. Ular juda qulay vaziyatga ega bo'lsa-da, foydalana olmadi. G'alabani saqlab qolish uchun ham so'nggi daqiqalarga qadar xushyorlikga katta etibor qaratdik.

Kiritgan gollari borasida

- “Xorazm”ning oxirgi o'yinlarida bosh murabbiy meni hujumkor yarim himoyachi sifatida o'ynatmoqda. Albatta, bu men uchun begona bo'lgan poziciya hisoblanadi. Shunga qaramay, Aleksandr Ejov mening imkoniyatlarimni bilgani tufayli erkin harakat qilishimga imkoniyat berdi. “Yangier”ga kiritgan gollarimga to'xtalsam, o'sha kuni jamoadoshlarimning mehnati bilan bu amalga oshdi. Ochig'i, kiritgan gollarimni yaqinda hayotdan ko'z yumgan do'stim Jonibekga bag'ishladim.

Eng qiyin o'yin to'g'risida

- Hozirgacha Pro-liga doirasida beshta uchrashuvda maydonga tushdim. Biz hamma raqiblar bilan yaxshi o'ynadik. Eng qiyin o'yin – “Neftchi”ga qarshi kechdi. Farg'onaliklar bilan bahsda yomon o'ynamadik. Omadimiz kelmadi. “Neftchi” esa yaratilgan vaziyatlaridan oqilona foydalanib, g'alabani tantana qildi.

Bobur Farhodov: “Bosh murabbiy meni hujum chizig'ida sinab ko'rmoqda”