Бу ўйинда хоразмликлар сафида ҳар иккала гол Бобур Фарҳодов ҳисобига ёзилди. Учрашувдан сўнг Фарҳодов билан суҳбатлашдик.

Ғалаба хусусида

- Мазкур учрашув олдидан мураббийимиз томонидан берилган кўрсатмаларни бажаришга ҳаракат килдик. Ғалаба йўлида майдонда боримизни бериб ўйнадик. Аслида биринчи бўлимнинг ўзида кўп гол уришимиз мумкин эди. Афсуски, яратилган имкониятларимиздан фойдалана олмадик. Шу ўринда “Янгиер” ҳам иккинчи бўлим охирида ҳисобни тенглаштириши мумкин эди. Улар жуда қулай вазиятга эга бўлса-да, фойдалана олмади. Ғалабани сақлаб қолиш учун ҳам сўнгги дақиқаларга қадар хушёрликга катта эътибор қаратдик.

Киритган голлари борасида

- “Хоразм”нинг охирги ўйинларида бош мураббий мени ҳужумкор ярим ҳимоячи сифатида ўйнатмоқда. Албатта, бу мен учун бегона бўлган позиция ҳисобланади. Шунга қарамай, Александр Ежов менинг имкониятларимни билгани туфайли эркин ҳаракат қилишимга имконият берди. “Янгиер”га киритган голларимга тўхталсам, ўша куни жамоадошларимнинг меҳнати билан бу амалга ошди. Очиғи, киритган голларимни яқинда ҳаётдан кўз юмган дўстим Жонибекга бағишладим.

Энг қийин ўйин тўғрисида

- Ҳозиргача Про-лига доирасида бешта учрашувда майдонга тушдим. Биз ҳамма рақиблар билан яхши ўйнадик. Энг қийин ўйин – “Нефтчи”га қарши кечди. Фарғоналиклар билан баҳсда ёмон ўйнамадик. Омадимиз келмади. “Нефтчи” эса яратилган вазиятларидан оқилона фойдаланиб, ғалабани тантана қилди.

Бобур Фарҳодов: “Бош мураббий мени ҳужум чизиғида синаб кўрмоқда”