Uchrashuvdan so'ng muborakliklar darvozaboni Botir Nosirovning fikrlariga quloq tutdik.

- Juda qiziqarli o'yin bo'ldi, - deya so'z boshladi Nosirov. O'yinga astoydil tayyorgalik ko'rdik. Raqibning kuchidan kelib chiqib, mashg'ulotlarda turli taktikalar ustida ishladik. Bevosita o'yinga to'xtalsam, bunday jangovar o'yin bo'lishi kutmagandik. Yigitlarga rahmat, ular oxirigacha kurashdi. Avvalgi turdagi mag'lubiyatdan so'ng bu uchrashuvda yaxshi natija ko'rsatmasak, muxlislarimiz oldida uyatli bo'lib qolardik. Shuni inobatga olib so'nggi daqiqalarga qadar maydonda borimizni berdik.

Kutilmagan jarohat tufayli maydonga tushishi borasida

- To'g'risi, kutilmagan holat ro'y berdi. Asosiy darvozabonimiz Shoxrux Eshbo'taev o'yin avvalidagi mashg'ulotlar paytida tizzasidan jarohat oldi. Natijada, o'yinda ishtirok eta olmasligi oydinlashganidan so'ng menga imkoniyat berildi. Men uchun bu kutilmagan holat bo'ldi. Ikki marotaba to'p olib chiqqanim kishini xafa qiladi.

Mavsum yakuniga qadar qo'yilgan maqsadlar to'g'risida

- Bizning jamoa doimo o'z oldiga yuqori maqsadlarni qo'ygan. Har qanday holatda ham “Mashal”ning rejalari va maqsadlari o'zgarmaydi. Bizni pastki ligaga tushirib yuborgan vaqtida ham hech qachon tushkunlikka tushmasdan, oldimizda qo'yilgan maqsadlar sari bosqichma-bosqich qadam tashladik. Joriy mavsumning qolgan uchrashuvlarida, muxlislarimizni g'alabalarimiz bilan xursand qilmoqchimiz. Tarkibimizdan bir nechta etakchi futbolchilarimiz tark etgani ham o'z tasirini ko'rsatmoqda. Asosan akademiyamizdan chiqqan yigitlar to'p tepmoqda. Ular yosh, hozirda Superligadagi o'yinlari orqali mahoratlarini oshirib bormoqda. Shunga qaramay, o'yindan-o'yinga natjalarimiz yaxshilanib borishiga ishonchim komil.

Botir Nosirov: “Har qanday holatda ham “Mashal”ning rejalari va maqsadlari o'zgarmaydi”