Бу ҳақда сайтимиз ижодкори — Шаҳбоз Беғамов хабар қилди.

"Бунёдкор" аъзоси сифатида ўтган мавсумни Суперлигада ўтказган футболчи "қалдирғочлар"ни тарк этди.

Фаолиятини "Насаф"да бошлаган, кейинчалик Баҳрайнда "Ал-Муҳаррақ" клуби шарафини бир муддат ҳимоя қилган вингер сўнгра яна "Бунёдкор"га қайтганди. 2018 йилги мавсумда эса Жанубий Кореянинг "Тэджон Ситизен" жамоасига ўтган футболчи салкам 1,5 йил яна легионер мақомида тўп тепди. Жорий йил ёзда эса яна "Бунёдкор"га қайтган Гадоев мавсумнинг иккинчи қисмидан эътиборан "қалдирғочлар"га кўмаклашди. Мавсум тугагач эса шартномаси ниҳоясига етган футболчи Озарбойжондан бўлган қизиқиш туфайли собиқ "Интер Баку", яъни ҳозирги "Кешля" номи билан аталадиган клуб билан шартнома имзолади.

Озарбойжон чемпионати турнир жадвалида учинчи ўринда кетаётган мазкур жамоа жорий мавсум Европа лигаси йўлланмаси учун жиддий курашмоқда. Айни пайтда чемпионатда биринчи давра ўйинлари якунига етган ва трансфер ойнаси очиқ. Мазкур трансфер бозоридан фойдаланган клуб ўзбекистонлик иқтидорли футболчи Шоҳруҳ Гадоев билан шартнома имзолади. Шартнома 1,5 йилга тузилди.

"Кешля" жамоаси Озарбойжон премьер лигасида 2008 ҳамда 2010 йиллари чемпионга айланган. Шунингдек, клуб 2018 йилги мавсумда Озарбойжон Кубогида ғолиб чиққан. Жорий мавсум "Кешля" жамоаси совринли ўринлар учун жиддий курашмоқда.

Эслатиб ўтамиз, куни кеча Озарбойжон чемпионатида биринчи давра якунланди ҳамда жамоалар таътилга йўл олишди. Премьер лига ўйинлари февралдан эътиборан яна давом эттирилади.

Breaking news: Шоҳруҳ Гадоев фаолиятини Европада давом эттиради