Бу ўйин жамоаларнинг турнир жадвалида эгаллаб турган ўрнидан қатъий назар қизиқ кечиши кутилмоқда. Айтганча, учрашув 19:00да старт олади.

Бугунги баҳсни тошкентлик ҳакамлар бригадаси бошқариб боради. Бош ҳакамдан тортиб қанот ҳакамлари-ю, ҳакамлар назоратчисига тошкентлик.

Бугун бош ҳакам ролида Ҳасан Рўзиев. Бу ҳакам фаолияти давомида шу пайтгача олий лигада 82та ўйинни бошқарган. Пойтахт дербиси эса унинг 83-ўйини бўлади.

Ҳасан Рўзиев шу вақтга қадар бўлиб ўтган "Бунёдкор" - "Пахтакор" баҳсида ишлмаган. Бу дегани у биринчи бор "Бунёдкор"нинг ўз майдонида "Пахтакор"га қарши баҳсини бошқаради.

Бугун биз "Бунёдкор" стадионида 11-дербига гувоҳ бўламиз. Аввалги ўнта учрашувнинг еттитасини Равшан Эрматов бошқарган. Шунингдек, Александр Петров, Марат Исмоилов ҳамда Шерзод Қосимовлар биттадан ўйинда ишлашган. Шундай экан, бугун пойтахт дербисини бошқарган ҳакамлар сони яна биттага кўпаяди.

Биласизми? Ҳасан Рўзиев шу пайтгача "Пахтакор"нинг сафардаги бирортаям ўйинини бошқармаган. Демак, бу ҳам ўзига яраша янгилик бўлади. Статистикага мурожаат қиладиган бўлсак, Рўзиев "Бунёдкор"нинг уй учрашувларида атиги икки марта ишлаган бўлиб, "Бунёдкор" бирида ғалаба қозонган, бирида дуранг ўйнаган.

2013 йил Ҳасан Рўзиев бошқарган "Бунёдкор" - "Бухоро" баҳси 4:0 ҳисобида якун топган бўлса, 2014 йилги "Бунёдкор" - "Локомотив" қарама-қаршилиги 1:1 тугаган.

Айтиб ўтганимиздек, Рўзиевнинг ҳакамлик фаолиятида бугун иккита янгилик бўлади. Биринчиси, Тошкент дербиси мақомига эга "Бунёдкор" - "Пахтакор" баҳсини биринчи марта бошқаради, қолаверса "Пахтакор"нинг сафардаги ўйинида илк марта ишлайди.

Х.Холиқов.

Бугун дерби. Ўйинни ким бошқаришини биласизми?