Futbol maydonidagi poziciyalarga etibor qaratsak, o'yin natijasiga eng ko'p tasir qiladgan futbolchi darvozada turishiga guvoh bo'lamiz. Shu tufayli har ikki jamoa posbonlarining final oldidagi kayfiyatlari bilan qiziqdik.

Nozima Hasanova (So'g'diyona-W):
Biz jamoamiz bilan birgalikda O'zbekiston Kubogi finaligacha etib kelganimizdan juda ham xursandmiz. "Bunyodkor" jamoasini munosib raqib deb hisoblaymiz. Albatta, barcha jamoalar qatori biz ham o'zimizga bu yilgi mavsum uchun katta maqsadlar qo'yganmiz. To'g'ri, ushbu mavsumda biz "Bunyodkor"ni mag'lub eta olmadik. Lekin, tengma-teng bellasha oldik. Biz ularni yutolmaganimizning sababi ruhan tayyorgarlik yoki omad etishmaganidan deb o'ylayman. Bundan nafaqat o'zim, balki jamoamiz o'yinchilari katta motivaciya oldi. Hozir finaloldi mashg'ulotlarimiz juda ham yaxshi o'tmoqda. Jamoamiz bilan birgalikda yaxshi natijaga erishib, Jizzaxga g'alaba bilan qaytamiz degan umiddamiz.

Olga Qahhorova (Bunyodkor-W):
O'ylashimcha, bizni juda ham qiziqarli va murosasiz to'qnashuv kutyapti. Kubok uchun "jang"da 2 teng kuchli jamoa ishtirok etadi. Maydonda sovrinni qo'lga kiritish uchun qo'limizdan kelgan barcha ishni qilamiz. Umid qilamanki, o'z o'yinimizni ko'rsatib, g'alaba qozonamiz. "So'g'diyona-W" esa munosib va kuchli raqib. Barchaga omad tilayman. Eng muhimi, o'yin jarohatlarsiz, chiroyli o'tsin va kuchli tomon yutsin.

Eslatib o'tamiz final bahsi Toshkent vaqti bilan 16:00da start oladi.

Bugun final. Jamoalar qanday kayfiyatda?