Футбол майдонидаги позицияларга эътибор қаратсак, ўйин натижасига энг кўп таъсир қиладган футболчи дарвозада туришига гувоҳ бўламиз. Шу туфайли ҳар икки жамоа посбонларининг финал олдидаги кайфиятлари билан қизиқдик.

Нозима Ҳасанова (Сўғдиёна-W):
Биз жамоамиз билан биргаликда Ўзбекистон Кубоги финалигача етиб келганимиздан жуда ҳам хурсандмиз. "Бунёдкор" жамоасини муносиб рақиб деб ҳисоблаймиз. Албатта, барча жамоалар қатори биз ҳам ўзимизга бу йилги мавсум учун катта мақсадлар қўйганмиз. Тўғри, ушбу мавсумда биз "Бунёдкор"ни мағлуб эта олмадик. Лекин, тенгма-тенг беллаша олдик. Биз уларни ютолмаганимизнинг сабаби руҳан тайёргарлик ёки омад етишмаганидан деб ўйлайман. Бундан нафақат ўзим, балки жамоамиз ўйинчилари катта мотивация олди. Ҳозир финалолди машғулотларимиз жуда ҳам яхши ўтмоқда. Жамоамиз билан биргаликда яхши натижага эришиб, Жиззахга ғалаба билан қайтамиз деган умиддамиз.

Олга Қаҳҳорова (Бунёдкор-W):
Ўйлашимча, бизни жуда ҳам қизиқарли ва муросасиз тўқнашув кутяпти. Кубок учун "жанг"да 2 тенг кучли жамоа иштирок этади. Майдонда совринни қўлга киритиш учун қўлимиздан келган барча ишни қиламиз. Умид қиламанки, ўз ўйинимизни кўрсатиб, ғалаба қозонамиз. "Сўғдиёна-W" эса муносиб ва кучли рақиб. Барчага омад тилайман. Энг муҳими, ўйин жароҳатларсиз, чиройли ўтсин ва кучли томон ютсин.

Эслатиб ўтамиз финал баҳси Тошкент вақти билан 16:00да старт олади.

Бугун финал. Жамоалар қандай кайфиятда?