Турнир жадвалида 12-ўринни эгаллаб турган "Андижон" ўз майдонида "Металлург"ни қабул қилади. "Металлург" ҳозирча 7 очко билан еттинчи ўринда боряпти. Бу жамоа аввалги тур сафарда "Локомотив"ни 3:0 ҳисобида мағлуб этиб, анча шов-шувга сабабчи бўлди.

"Металлург" шу пайтгача сафарда учта ўйин ўтказиб, уч хил натижа қайд этди. АГМК билан дуранг ўйнаган жамоа, "Пахтакор"га имкониятни бой берди ва "Локо" устидан ғалаба қозонди.

"Андижон"га келсак, Виктор Кумиков шогирдлари ҳали ғалаба нашидасини суришгани йўқ. "Бургутлар" мавсумни иккита мағлубият билан бошлаб, сўнгра икки бор дуранг қайд этишди. Бугунги ўйин анждижонликлар учун уйдаги тўртинчи беллашув бўлади ва жамоа илк бор уч очколи бўлишга уриниб кўради.

"Металлург" ҳақида нима дейиш мумкин? Андрей Шипилов жамоаси футбол ўйнашни билади ва кўп жамоаларга бошоғриқ бўлиб келмоқда. Бу томонлама бугун майдон эгаларига осон бўлмаслиги аниқ. Лекин ўз навбатида "Андижон"га ҳам ғалаба сув ва ҳаводек зарур.

P.S. Соат 19:00да бошланадиган ўйинни "Маҳалла" телеканали орқали тўғридан тўғри кузатиб боринг.

Бугун футбол. "Андижон" - "Металлург"