JCH-2018 saralash o'yinlariga tayyorgarlik ko'rayotgan O'zbekiston milliy terma jamoasiga uch va undan ko'p futbolchi chaqirilgani tufayli "Lokomotiv", "Nasaf" va "Paxtakor" ishtirokidagi bahslar nomalum muddatga qoldirilgan.

Bugun vodiy derbisida "Neftchi" "Qo'qon-1912" mehmoni bo'ladi. "Qo'qon-1912" ikkinchi davraning ikkita bahsini safarda o'tkazib ikkalasida ham mag'lub bo'ldi. Qolaversa, o'z maydonida "Obod"ni zo'rg'a 1:0ga yutdi. Jamoaning o'yinida pasayish bormi? Hozircha bir narsa deyish qiyin, lekin natijalarga qaraydigan bo'lsak, qo'qonliklar birinchi davrada safarda faqat bir marta mag'lub bo'lishgandi. Hozir esa ikki o'yin - ikki mag'lubiyat.

Bugun "Qo'qon-1912"ni garchi o'z maydonida o'ynagani bilan "Neftchi"ga qarshi oson bo'lmagan uchrashuv kutib turibdi. Shu paytgacha 13 ochko to'plagan "Neftchi" turnir jadvalida faqat "Obod"dan yuqori o'rinda. Jamoa Vadim Abramov kelganidan beri g'alaba qozona olmadi. Abramov qo'l ostida farg'onaliklar birinchi davraning oxirgi uchta turida zafar quchishmagandi. Ikkinchi davra ham g'alabasiz davom etmoqda.

"Neftchi" bungacha ketma-ket ikki bor o'z maydonida 1:1 hisobida durang o'ynagan bo'lsa, safarda "Paxtakor"ga 0:6 hisobida engildi. Tabiiyki bunday natijalar bosh murabbiyning asabiylashishiga olib keladi. Muxlislar esa Abramov boshchiligidagi "Neftchi" qachon g'alaba qozonarkin deya kun sanashmoqda. Bugungi bellashuvda favorit kimligini aytish qiyin. To'g'ri, "Qo'qon-1912" uyda o'ynaydi, lekin "Neftchi" ham qarab turmasa kerak.

Bugun futbol. "Qo'qon-1912" - "Neftchi"