Bir tomondan FIFA prezidenti Janni Infantinoning tashrifi, ikkinchi tomondan qizib borayotgan Superligada 9-turning bezagiga aylanishi kutilayotgan "Bunyodkor" - "Olimpik" uchrashuvi.

O'zaro o'yinlar

Jamoalar o'tgan mavsumda tarixda ilk bor Superliga doirasida to'qnash kelishdi. Birinchi davrada kechgan uchrashuvda aynan "Bunyodkor" stadionida Timur Kapadze shogirdlari "qaldirg'ochlar"ning qanotini qayirishni uddasidan chiqqan edi (5:1). Superliga debyutantidan dastlabki tarsakidan so'ng o'shanda "Bunyodkor" ketma-ket 7ta uchrashuvda g'alaba qozonmagan edi. Ikkinchi davradagi o'yin esa Boshkovich boshqaruviga to'g'ri kelgan va unda tomonlar murosa ko'chasini tanlagan (1:1).

Uyda yuta olmayotgan "Bunyodkor"

"Bunyodkor" bu mavsumni asosan safarda o'tkazmoqda va mehmonda kerakli natijaga erishyapti. Murod Otajonov "komanda"si 7ta turdan 5tasini mehmonda o'tkazdi va jami 12 ochko jamg'ardi, 4ta g'alaba va 1 mag'lubiyat, to'plar nisbati 9:3. Uyda esa aksi. "Turon" (0:0) va "Nasaf" (1:1) Toshkentdan ortga 1 ochko bilan qaytishdi. Jamoa "Bunyodkor" stadionida so'nggi bor 2022 yil 4-turda "Dinamo" bilan uchrashuvda g'alaba qozongan. Bunga ham 1 yildan oshdi. Ikkinchi davrani esa OKMK, "Lokomotiv", "Jar" stadionlarida nominal mezbon sifatida raqiblarini qabul qildi.

"Olimpik". Asosiy muammo tepada

Bu jamoa bamisoli dengiz to'lqiniga o'xshaydi. Bir tekisda yo'lida ketayotgani yo'q. Bir undoq, bir mundoq. Timur Kapadze jamoasida asosiy muammoni ikkinchi qavat bilan bog'lashimiz mumkin. "Nasaf", "Andijon" markaziy himoyachilarining joy tanlay olishi, pozicion to'g'ri harakat qilishi hisobiga ikkinchi qavatda "Olimpik"ni jazolashga urinishdi. Ko'ramiz, bugun "Bunyodkor" ham raqibining mazkur xatosidan foydalana olarmikin?

Stadion to'ladimi?

Agarda o'yinlar qiziqarli, tomoshabop bo'lsa muxlis shundoq ham stadionga tushadi. U-20 Osiyo kubogida ham avvalida biroz tushunmovchilik bo'ldi-yu, g'alabalar qo'lga kiritilavergani sari stadion o'z-o'zidan to'lishni boshladi. Terma jamoa, futbolchilar o'z o'yinlari, g'alabalari bilan odamlarni arenaga qaytara olishdi. Demak Toshkentda muxlis bor. Bugun nima bo'lar ekan, 18:30 arafasida guvohiga aylanamiz. Barchani "Bunyodkor"ga talkif qilib qolamiz. Jamoalar o'z o'yinlari bilan minglab insonlarni zeriktirmasligiga umid qilamiz.

Stadionda ko'rishguncha!

"Bunyodkor" - "Olimpik". Stadion to'ladimi?