Murod Otajonov: O'yin muxlislarga yoqdi deb o'ylayman. Yigitlarga alohida minnatdorchilik bildirmoqchiman. Bahs og'ir o'tdi, sxemalarimizni o'zgartirishga majbur bo'ldik, lekin maqsadga erishdik. Yigitlar, oshpaz, haydovchi, hamma-hammaga rahmat. Avtobusimiz haydovchisi birorta svetoforda qizilga tushmadi va to'xtamay maydonga olib keldi. Shunaqa irim bor.

OKMK Chempionlar ligasida o'ynaydi, tarkibda terma jamoada o'ynaydigan futbolchilar bor, murabbiy katta tajribaga ega. Bahs yaxshi o'tdi, lekin kutilmagan voqealarga boy bo'ldi. Jamoamiz yoshlarining kelajagi porloq. Uchrashuv oxirida Umid Sultonov maydonga tushdi va golli pas berdi. Avvalgi o'yinda gol uib, o'z nomini tabloga yozdirib qo'ygan edi. Yoshlarga etibor berishda davom etamiz.

- Umid Sultonov faqat bu yil emas, o'tgan yilgi bahslarda ham foydali harakatlarni amalga oshirardi. Nega uni avvalroq maydonga tushirmayapsiz?

- Umid bizning "sehrli qurolimiz". Kutilmagan paytda maydonga tushib, gol urib, pas beryapti. Biz to'g'ri qilayotgandirmiz, balki aksi. Turkiyadagi yig'inlarda uni asosiy tarkibda maydonga tushirib ko'rdik. Ayni damda Umid Sultonov o'yinda 90 daqiqa harakat qila olmaydi, shu sababli zaxiradan uni maydonga tushiryapmiz.

- Ko'pchilikni bir savol qiziqtiradi. Siz jamoa bosh murabbiyisiz. Jamoa natijalariga kim javobgar, Murod Otajonovmi yoki Hikmat Hoshimov?

- Bunday savollar ko'p bo'lyapti. Bizda "kollegiana" degan narsa bor. Barcha murabbiylardan maslahat olamiz, Yuriy Vazgenovich Sarkisyanning fikrlari bilan qiziqamiz. Natijaga keladigan bo'lsak, bunga bosh murabbiy sifatida men javob beraman.

"Bunyodkor" ustozi: "Umid Sultonov bizning "sehrli qurolimiz"