Мурод Отажонов: Ўйин мухлисларга ёқди деб ўйлайман. Йигитларга алоҳида миннатдорчилик билдирмоқчиман. Баҳс оғир ўтди, схемаларимизни ўзгартиришга мажбур бўлдик, лекин мақсадга эришдик. Йигитлар, ошпаз, ҳайдовчи, ҳамма-ҳаммага раҳмат. Автобусимиз ҳайдовчиси бирорта светофорда қизилга тушмади ва тўхтамай майдонга олиб келди. Шунақа ирим бор.

ОКМК Чемпионлар лигасида ўйнайди, таркибда терма жамоада ўйнайдиган футболчилар бор, мураббий катта тажрибага эга. Баҳс яхши ўтди, лекин кутилмаган воқеаларга бой бўлди. Жамоамиз ёшларининг келажаги порлоқ. Учрашув охирида Умид Султонов майдонга тушди ва голли пас берди. Аввалги ўйинда гол уиб, ўз номини таблога ёздириб қўйган эди. Ёшларга эътибор беришда давом этамиз.

- Умид Султонов фақат бу йил эмас, ўтган йилги баҳсларда ҳам фойдали ҳаракатларни амалга оширарди. Нега уни аввалроқ майдонга туширмаяпсиз?

- Умид бизнинг "сеҳрли қуролимиз". Кутилмаган пайтда майдонга тушиб, гол уриб, пас беряпти. Биз тўғри қилаётгандирмиз, балки акси. Туркиядаги йиғинларда уни асосий таркибда майдонга тушириб кўрдик. Айни дамда Умид Султонов ўйинда 90 дақиқа ҳаракат қила олмайди, шу сабабли захирадан уни майдонга туширяпмиз.

- Кўпчиликни бир савол қизиқтиради. Сиз жамоа бош мураббийисиз. Жамоа натижаларига ким жавобгар, Мурод Отажоновми ёки Ҳикмат Ҳошимов?

- Бундай саволлар кўп бўляпти. Бизда "коллегиана" деган нарса бор. Барча мураббийлардан маслаҳат оламиз, Юрий Вазгенович Саркисяннинг фикрлари билан қизиқамиз. Натижага келадиган бўлсак, бунга бош мураббий сифатида мен жавоб бераман.

"Бунёдкор" устози: "Умид Султонов бизнинг "сеҳрли қуролимиз"