Jamoa oraliq tanaffusda yig'inni asosan Toshkentdagi "Jar" stadionida olib bordi. U erda mashg'ulotlar bilan bir qatorda kun-ora sinov-nazorat bahslari ham tashkil etildi. Bu orada murabbiylar shtabi tarkibni kuchaytirish ishlarini ham olbi bordi. Va buning uchun ayrim chiziqlarga o'yinchilarni taklif etib, maqul kelganlarini jamoada olib qolishdi. Mavsumni "Buxoro"da boshlagan etakchi himoyachilardan biri Asqar Muhiddinov kutilmaganda, kuni-kecha jamoa bilan xayrlashdi. Malumotlarga qaraganda futbolchi bugungi kunda "Qizilqum" bilan birga. Bosh murabbiy Tachmurod Agamurodov ushbu yo'qotishni o'rnini to'ldirishi maqsadida belorussiyalik himoyachi Yuriy Rijkoni olib keldi. O'z vaqtida Belorussiya yoshlar terma jamoasida to'p surgan 24 yoshli himoyachi ikkinchi davrada "Buxoro" sharafini himoya qiladigan bo'ldi. Rijko (fotoda 50-raqam) 17 yoshida Belorussiyaning nomdor jamoalaridan biri BATE murabbiylarida qiziqish uyg'otgan va shu yilning o'zida u yoshlar jamoasiga jalb etilgan. Ushbu jamoani sharafini uch yil himoya qilgan. Shu yillar davomida iqtidorli himoyachi asosan o'rinbosarlar tarkibida harakat qilgan. Asosiy jamoa safida esa bitta rasmiy o'yinda ishtirok etgan.

Keyinchalik aniqrog'i, 2009 yilda futbolchi ko'proq o'yin amaliyotiga ega bo'lish maqsadida "Smorgon" jamoasiga ko'chib o'tgan. Bu jamoada 13ta bahsda to'p surgan. 2010 yilda esa Yuriy Rijko yana jamoasini o'zgartirishga qaror qilgan. Bu safar uni "Torpedo" o'z safiga jalb etgan. Uning mazkur klubdagi ikki yillik faoliyati ijobiy kechgan deyish mumkin. Sababi bo'ydor bo'lgan himoyachi "Torpedo" libosida 38ta uchrashuv o'tkazgan va raqiblar darvozasiga ikkita to'p kiritishga ham muvaffaq bo'lgan. Joriy yilda esa "Sluck" uning faoliyatidagi to'rtinchi jamoa bo'ldi. Ammo unga bu jamoada o'nysha naisb etmadi. Ko'p vaqtini zaxirada o'tkazishga majbur bo'lgan himoyachi yaqinda "Buxoro"dan tushgan taklifni qabul qildi. Rijkoning erishgan yutuqlaridan biri deb esa 2011 yil Daniyada bo'lib o'tgan yoshlar o'rtasidagi Evropa chempionatida Belorussiya yoshlar terma jamoasi safida bronza medal sohibi bo'lganligini aytish mumkin.

Endi Rijko ilk bor legioner sifatida to'p suradigan bo'ldi. "Buxoro"da u endi Devid Oniya bilan birga markaziy himoyada tandem bo'lishi kutilmoqda. Ko'ramiz, legionerlar ishtirokidagi juftlik "Buxoro"ga qanchalik foyda keltirar ekan.

"Buxoro" bu legionerdan tashqari yana uch nafar mahalliy futbolchilarni o'z tarkibiga qo'shib oldi. Birinchi davrani "Bunyodkor"da o'tkazgan himoyachi Abduqahhor Xojiakbarov va hujumchi Bahodir Pardaev endilikda buxoroliklar uchun to'p suradigan bo'ldi. Shuningdek "Buxoro" uchun begona bo'lmagan Ilya Ilin ham endilikda sobiq jamoasiga qaytdi. Bu futbolchi shu kunga qadar "Qizilqum" sharafini himoya qilib kelayotgandi.

Malumot uchun:
Yuriy Rijko
Tug'ilgan yili va joyi: 10.10 1989. Belorussiya, Minsk.
Fuqaroligi: Belorussiya.
Bo'yi: 193 sm.
Vazni: 86kg.
Ampluasi: himoyachi.

Islombek RUSTAMBEKOV.

"Buxoro" safiga qo'shilgan belorussiyalik futbolchi haqida