Bugun Superliganing 6-tur uchrashuvlariga start beriladi. Dastlab Namanganda vodiy derbisi "Navbahor" - "Andijon" uchrashuvi bo'lsa, "Surxon" bu turni ham mehmonda Navoiyda "Qizilqum"ga qarshi o'tkazadi. Mutaxassis fikri rukning bu safargi mehmoni taniqli sobiq futbolchi Abdumajid Toirov bilan jamoalarning imkoniyatlarini tahlil qilishga harakat qilib ko'rdik.

"Navbahor" - "Andijon"

Namanganliklar bu yil o'z maydoni qisqa qilib aytganda bamisoli bahaybat "lochin". Uydagi 3ta o'yinda raqiblari darvozasiga jami 9ta gol urdi. Sermahsullik yuqori. Biroq jiddiy raqiblar qarshisida hech narsa qila olgani yo'q. "Andijon"da tartibli himoya bor. Aynan orqa chiziqda etakchilar ko'pchilikni tashqil qiladi. Bu borada Abdumajit Toirovning fikrlari quyidagicha bo'ldi:

- Derbi maqomi bo'lgani bilan, syurpriz kutmayman. "Navbahor" o'yin sifati va tarkib bo'yicha "Andijon"dan ustun. "Andijon" faqat 100% koncentraciya hisobiga ochko olishi mumkin. Shunda xam "Navbahor"dan omad yuz o'girgan taqdirda.

Tarkib, murabbiylar shtabi borasida bu yil katta o'zgarishlar qilgan jamoalar to'qnashuvi. "Surxon" o'yin va natija borasida hammani xayron qoldirishda davom etmoqda. Garchi o'tgan turda Qarshida "Nasaf"ga mag'lub bo'lgan bo'lsada, kuchli raqib qarshisida o'zlarini yo'qotib qo'yishmadi va 2ta gol ham urishdi. Asror Aliqulov boshchiligidagi "Qizilqum"da esa barqarorlik yo'q. Goh unday natija, goh bunday natija. Mutaxassisimiz Navoiydagi o'yin haqida shunday deydi:

"Qizilqum" - "Surxon"

- Juda ham qiziq va murosasiz o'yin bo'ladi, deb o'ylayman. Kuchlar teng, motivaciya yuqori darajada, 6 ochkoli o'yin. Buni murabbiylar ham futbolchilar ham yaxshi tushunishadi. Kim ruhiy taraflama yaxshi tayyor bo'lsa, o'sha jamoa yutadi. Ikkala jamoa oldingi turdagi mag'lubiyatni esdan chiqarib, bor etiborini g'alaba qozonishga qaratishi aniq. Shuni aytishim mumkin bu o'yinda durang bo'lmasa kerak.

"Derbidan syurpriz kutmayman, Navoiyda durang bo'lmasa kerak" - Superliga bugungi uchrashuvlar oldidan mutaxassis fikri