Бугун Суперлиганинг 6-тур учрашувларига старт берилади. Дастлаб Наманганда водий дербиси "Навбаҳор" - "Андижон" учрашуви бўлса, "Сурхон" бу турни ҳам меҳмонда Навоийда "Қизилқум"га қарши ўтказади. Мутахассис фикри рукнинг бу сафарги меҳмони таниқли собиқ футболчи Абдумажид Тоиров билан жамоаларнинг имкониятларини таҳлил қилишга ҳаракат қилиб кўрдик.

"Навбаҳор" - "Андижон"

Наманганликлар бу йил ўз майдони қисқа қилиб айтганда бамисоли баҳайбат "лочин". Уйдаги 3та ўйинда рақиблари дарвозасига жами 9та гол урди. Сермаҳсуллик юқори. Бироқ жиддий рақиблар қаршисида ҳеч нарса қила олгани йўқ. "Андижон"да тартибли ҳимоя бор. Айнан орқа чизиқда етакчилар кўпчиликни ташқил қилади. Бу борада Абдумажит Тоировнинг фикрлари қуйидагича бўлди:

— Дерби мақоми бўлгани билан, сюрприз кутмайман. "Навбаҳор" ўйин сифати ва таркиб бўйича "Андижон"дан устун. "Андижон" фақат 100% концентрация ҳисобига очко олиши мумкин. Шунда хам "Навбаҳор"дан омад юз ўгирган тақдирда.

Таркиб, мураббийлар штаби борасида бу йил катта ўзгаришлар қилган жамоалар тўқнашуви. "Сурхон" ўйин ва натижа борасида ҳаммани хайрон қолдиришда давом этмоқда. Гарчи ўтган турда Қаршида "Насаф"га мағлуб бўлган бўлсада, кучли рақиб қаршисида ўзларини йўқотиб қўйишмади ва 2та гол ҳам уришди. Асрор Алиқулов бошчилигидаги "Қизилқум"да эса барқарорлик йўқ. Гоҳ ундай натижа, гоҳ бундай натижа. Мутахассисимиз Навоийдаги ўйин ҳақида шундай дейди:

"Қизилқум" - "Сурхон"

— Жуда ҳам қизиқ ва муросасиз ўйин бўлади, деб ўйлайман. Кучлар тенг, мотивация юқори даражада, 6 очколи ўйин. Буни мураббийлар ҳам футболчилар ҳам яхши тушунишади. Ким руҳий тарафлама яхши тайёр бўлса, ўша жамоа ютади. Иккала жамоа олдинги турдаги мағлубиятни эсдан чиқариб, бор эътиборини ғалаба қозонишга қаратиши аниқ. Шуни айтишим мумкин бу ўйинда дуранг бўлмаса керак.

"Дербидан сюрприз кутмайман, Навоийда дуранг бўлмаса керак" — Суперлига бугунги учрашувлар олдидан мутахассис фикри