Umuman olganda, oxirgi haftada shveycariyalik forvardning maoshi juda ko'p muhokama qilindi. O'zim ham uning bitta goli Toshkent klubi uchun 149 ming evroga tushayotgani haqida yozgandim.

Eren Derdiyokning bitta goli necha pul turadi? Uning "Paxtakor"dagi bir kunichi?

Shundan keyin saytimizda so'rovnoma o'tkazildi. Unda muxlislarning aksar qismi "Yaxshi bo'ldi, shuncha pul olib foydasi tegmayotgandi", degan qarorga kelgan. Bu qanchalik to'g'ri? Quyida shu haqda.

Shartnoma borasida klub uchun muammo paydo bo'lgan esa, taxmin qilish mumkinki, Eren hamkorlik bitimini bir tomonlama buzgan.

Xabaringiz bor, mavsum avvalida "Paxtakor" futbolchilariga bir necha oylik maosh to'lanmayotgani to'g'risida xabarlar tarqalgandi. Bu rost bo'lsa, Derdiyokda klub bilan shartnomani bir tomonlama bekor qilish huquqi paydo bo'ladi va klub aybdor deb topiladi. FIFA qoidalariga ko'ra, ikki oy muddat davomida oylik to'lanmagan taqdirda futbolchi o'rtadagi shartnomani buzib ketsa, o'yinchi haq deb topiladi. Biz bu borada xalqaro sport huquqi bo'yicha mutaxassislarimizdan biri bilan bog'lanib, voqealar rivojining ehtimoliy ko'rinishi bilan qiziqdik.

"Paxtakor" futbolchini 2 oy mobaynida oylik maoshsiz qoldirgan bo'lsa, unda shartnomani buzib ketish huquqi paydo bo'ladi. Agar, Eren bilan ham shunday bo'lsa, bu klub uchun juda ham jiddiy signal. Chunki bunday holatda "Paxtakor" shartnomaning oxirigacha mo'ljallangan summani to'lab berishga majbur bo'ladi, hatto undan ham qimmatroqqa tushishi mumkin. Yani, Eren o'sha maoshni o'ynamasdan turib, jaraq-jaraq sanab olaveradi.
Umid qilamizki, kelishuv ikkala tomonning roziligi bilan buzilgan. Aks holda, Shveycariyalik futbolchi tez orada FIFAga arz yozishini taxmin qilish qiyin emas", - deydi mutaxassis.

Eslatib o'tamiz, bu kabi holatlar futbolimizga begona emas. 2014 yilda "Bunyodkor" bilan shartnomani shu vaj bilan bekor qilib ketgan Sergey Simonenko 2019 yilda o'z pullarini (400 mln so'm atrofida) FIFA orqali undirib olgan bo'lsa, 2020 yilda Namanganning "Navbahor" klubi Aleksandr Belenkovga 500 ming dollardan ortiqroq mablag'ni to'lab berishga majbur bo'lgan edi.

Xullas, agar Derdiyok shartnomani bir tomonlama buzgan bo'lsa, "Paxtakor" qimmatga tushadi. FIFA har qanaqasiga ham shveycariyalik futbolchining haqqini undirib beradi. Bu haqda "sherlar" matbuot xizmatidan malumot olishga harakat qilib ko'rdik. "Paxtakor" vakilining takidlashicha, bu borada jamoa huquqshunoslari ishlayapti va tez orada rasman elon qilinadi. Voqealar rivojini birga kuzatamiz, Championat.asia'dan uzoqlashmang!

P.S. "Paxtakor" qishda Derdiyok bilan xayrlashib, undan 6 barobar arzonroqqa o'ynaydigen Igor Sergeevni ushlab qolsa, klub uchun har tomonlama foydali bo'lar edi. Shveycariyalik futbolchi joriy mavsum "sherlar" libosida 13 o'yin o'tkazib, 4 ta gol urdi.

Faxriddin Ro'ziev

Derdiyokning ketishi "Paxtakor"ga qimmatga tushadi!