- Дилшод ака, жамоангиз бугун етакчи жамоага қарши ўйнаб, ғалаба қозонди. Учрашув ҳақида нима дейсиз?

- Жамоамиз учун ҳар бир ўйин қийин. Лекин шунга қарамай ҳар бир баҳсга ғалаба учун чиқамиз. Мақсадимиз эса “Машъал”нинг асосий жамоасига ва турли ёшдаги терма жамоаларимизга муносиб ўйинчиларни етказиб беришдир. Ўйинга келадиган бўлсак, “Қўқон-1912” яхши жамоа. Лекин мезбонлар бугун бизни осонликча ютамиз деган ҳаёлга боришган бўлса керак.

- Айтингчи, ғалаба кўпроқ ниманинг эвазига қўлга киритилди? “Қўқон-1912” кучсиз ўйнадими ёки жамоангиз кучли ўйнадими?

- Ростини айтганда, “Машъал-2” бугун кучлироқ кўринди. Йигитлар учрашувга яхши тайёргарлик кўрганди. Бу ўйин давомида билиниб турди. Ёш футболчиларга барқарорлик етишмайди. Бугун яхши ўйнаса, эртасига аксинча бўлиши мумкин. Шогирдларимга бугунги мазмунли ўйин учун миннатдорчилик билдириб қоламан.

- Агарда бугун жамоангиз дуранг қайд этганида, бу сиз учун қониқарли натижа бўлармиди ёки...

- Албатта, олий лигага чиқиш учун курашаётган жамоа билан сафарда дуранг ўйнаш ҳам қониқарли натижа дейиш мумкин.

- Бугун “Машъал-2”ни ғалаба қозонишига қанчалик ишонгандингиз?

- Ҳар бир ўйинга чиқишдан олдин, ишонч бўлади. Ўйин тугаганидан сўнггина, мағлуб бўлганимизга ёки ғалаба қозонганимизга амин бўламан.

- Қўқондан уч очко билан қайтиш бу сиз учун кутилмаган натижа деса бўладими?

- Ҳа.

- Бугунги учрашувда кўпроқ қайси шогирдларингиз ажралиб турди?

- Биз бир жамоамиз. Бирор-бир ўйинчини аълоҳида кўрсатиш ноўрин бўлса керак. Ғалаба бутун жамоаникидир.

- Жамоангиз кейинги икки турни пойтахт жамоаларига қарши ўтказади?

- Шундай. Биз ҳар бир учрашувга рақиб бўлишидан қатъий назар ғалаба учун майдонга чиқамиз. Шу боис “Истиқлол” ва “Пахтакор-2” билан баҳсда ҳам ютишга ҳаракат қиламиз.

- Жамоангиз чемпионатни нечанчи ўринда якунласа қониқиш хосил қиласиз?

- Биз учун турнир жадвалидаги ўрин муҳим эмас. Асосийси ёшларни тўғри тарбиялашдир.

- Жорий мавсум асосан ёшлар билан бирга ишладингиз. Лекин шунга қарамай нисбатан ижобий натижа қайд этдингиз. Ўзингизни бу борада қанчалик кўнглингиз тўлмоқда?

- Ҳа, бу йилги чемпионатдаги иштирокимиз ёмон чиқмади. Йигитларда ўсиш бор. Лекин олдинда ҳал қилинадиган ишлар кўп. Ишлашдан тўхтаб қолмаслик керак.

- Қўл остингиздаги йигитлардан кимларни асосий жамоага тавсия қилган бўлардингиз?

- Буни бош мураббий ҳал қилади. Агарда ихтиёр ўзимда бўлганида, 5-6 нафар йигитларни қўрқмасдан асосий жамоага жалб этган бўлардим. Хусан Олимжонов, Сардор Абдураимов, Жаъфар Исмоилов ҳамда Ҳумоюн Муртазоев шулар жумласидандир.

Исломбек Рустамбеков суҳбатлашди.

Дилшод Андаев: “Қўқон-1912" бизни осонликча таслим этамиз деб ўйлади чоғи”