"Futbol klublari o'z smetasini O'FA bilan kelishishni boshlagach, futbolchilarni ro'yxatdan o'tkazish imkoniyatini kim birinchi bo'lib qo'lga kiritishi masalasi o'zimiz uchun ham qiziq edi. Bu ishni birinchi bo'lib AGMK uddaladi.

Bugungi AGMK avvalgilaridan tubdan farq qilishini aytish kerak. Olmaliq KMK AJ boshqaruvi raisi Abdulla Xursanov sportga befarq bo'lmagan, uni yaxshi tushunadigan va albatta sport bilan birga ilmni ham bir vaqtda olib borish kerak, deb hisoblaydigan inson. Shu sababli AGMK yaxshi futbol akademiyasi tashkil etish ishlarini boshlagan. Bu borada klub vodiy, poytaxt hamda Angren, Ohangaron kabi shaharlarni bog'laydigan juda muhim ko'prik bo'lishi mumkin. Geografik jihatdan Olmaliq shunday joyda joylashgan.

AGMK futzal va ayollar futboli rivojiga eng katta hissa qo'shayotgan klub. Futzalda bir necha yillardan buyon etakchi ekanini bilasiz. Ayollar futbolida esa faqatgina AGMK hatto farm-klubiga ham ega. Bejizga klub bosh murabbiyi 2021 yilda eng yaxshi ayollar murabbiyi bo'lmadi. Uning shogirdlari Turkiya kabi ligalarga yo'l oldi.

Asosiy tarkib masalasida AGMK ketma-ket ikki yil sovrinli bo'ldi. Garchi 2021 yil xalqaro maydondan chetda qolgan bo'lsa-da, aynan o'sha yil xalqaro maydonda tarix ham yozdi. Va bu besamar ketmadi. Tojikistonning "Istiqlol" klubi bilan ikki bor bellashib, o'zining ayrim poziciyalarini shu jamoa etakchilari orqali to'ldirishga ham ulgurdi.

Oldinda AGMK stadion projektorini yanada yaxshilashi va 2023 yilgi mavsumga qadar yangi va sifatli maysaga ega bo'lishi kerak. Klub buning ustida ishlayapti. Uning oldiga iyun oyiga qadar projektorlarni talab qilingan minimum ko'rsatkichga keltirish vazifasi qo'yilgan", - deb yozadi Diyor Imomxo'jaev telegramdagi kanalida.

Diyor Imomxo'jaev: "AGMK birinchi bo'ldi"