Shu jihatdan mutaxassis, futbol bo'yicha ekspert, o'z vaqtida "Andijon", "Mashal", "Yangier" jamoalarida faoliyat olib borgan Diyor Mirzaboev Superliganing so'nggi turidagi asosiy uchrashuvlar haqida o'z fikrlarini bildirib o'tdi.

"Qizilqum" – "Nasaf"

O'yini haqida fikr bildiradigan bo'lsam, ikkala jamoa ham tomoshabop o'yin namoyish qilishmadi. "Qizilqum" asosan qarshi hujumga tayangan holda harakat qildi. "Nasaf" esa Elit OCHLda "Al-Axli"ga qarshi og'ir o'yin o'tkazganini inobatga olsak, oddiy uzun to'plar orqali o'ynashga urindi. "Nasaf" 3 ochko uchun harakat qildi va amalda uddaladi. Biroq ikki jamoa o'yinidan kelib chiqsak, durang adolatli natija bo'lar edi.

"Andijon" – "So'g'diyona"

"Andijon" ham Osiyo chempionlar ligasida o'yin o'tkazdi. Hozirgi paytda jamoa ikki frontda harakat qilishga tayyor emasdek ko'rindi. Bosh murabbiy almashinuvi katta o'zgarish bermadi. Aleksandr Xomyakov davridagi tajovuzkor futbol ko'rinmayapti - bu, albatta, shaxsiy fikrim. Mehmonda harakat qilgan "So'g'diyona" himoyaviy futbol namoyish etdi va qarshi hujumlarda mahorati yuqori ijrochilar hisobiga harakat qildi. Menimcha, ushbu bahsda "Andijon"ga omad kulib boqdi.

OKMK – "Bunyodkor"

OKMK jamoasi o'tgan turda yirik hisobda mag'lub bo'lgandi. Shu jihatdan murabbiylar shtabi jamoani tez tiklab, keyingi o'yinga yaxshi tayyorlaganini alohida etirof etish kerak. Futbolda shunday - bugun yutasiz, ertaga yutqazishingiz mumkin. Yuqori ijrochilar to'plangan jamoada gollarga boy o'yinlar ko'p bo'lishi tabiiy hol. OKMK har bir vaziyatdan unumli foydalandi va yakunda yirik hisobda g'alabaga erishdi. "Bunyodkor" haqida esa bir o'yin bilan keskin qaror chiqarish noto'g'ri. Futbolda bo'lib turadi, bu gal tajriba o'z so'zini aytdi.

"Sho'rtan" – "Paxtakor"

Bu bahs haqida aytsam, "Sho'rtan" Superligada jon saqlab qolish uchun harakat qilmoqda. Bunday jamoalarga qarshi o'ynash har doim qiyin. "Paxtakor" esa avvalgi turda chempionlik uchun kurashayotgan "Neftchi"ga qarshi irodali g'alaba qozongan edi. Bir futbolchisi kam bo'lib qolgan "Paxtakor"ning himoya chizig'ini yorib o'tish oson bo'lmadi, chunki jamoada mahorati yuqori ijrochilar bor. Agar to'liq tarkibda o'ynashganida, natija "Neftchi" tomonida ham bo'lishi mumkin edi. "Sho'rtan"ga qarshi bahsda esa "Paxtakor" xotirjamlikka berilgan bo'lishi ehtimol. Statistik malumotlar shuni ko'rsatmoqdaki, "Sho'rtan" ushbu uchrashuvda ham yaxshi harakat qildi.

"Buxoro" – "Navbahor"

"Buxoro" jamoasini tajribali Aleksandr Xomyakov qabul qilib oldi. Ko'p hollarda yangi murabbiy kelganidan keyin futbolchilarga boshqacha tasir ko'rsata oladi. Xomyakovni shaxsan yaxshi bilganim uchun uning futbolchilarni qay tarzda o'yinga tayyorlashi va ko'p individual suhbatlar o'tkazishini yaxshi bilaman. Bundan tashqari, yangi stadionda o'yin o'tkazish, psixologik tayyorgarlik omillari ham tasir ko'rsatdi. "Navbahor" esa ehtimol, xotirjamlikka berilgan. Xomyakovning shaxsiy statistikasiga etibor bersak, u doim "Navbahor"ga qarshi omadli o'yinlar o'tkazgan. Menimcha, "Buxoro" Superliga va Kubok bahslarida g'alabali yurishini davom ettiradi. "Navbahor" esa bu safar koncentraciya va diqqatni yo'qotib qo'ydi.

Turnir jadvali haqida

Chempionlik uchun intriga oxirgi turgacha saqlanib qolishi mumkin. "Paxtakor"ning "Sho'rtan" bilan durang o'ynashi "Neftchi"ni quvib etish imkoniyatini kamaytirdi. Superliga yakuniga 8 tur qolgan bir paytda, nazariy jihatdan "Nasaf", "Neftchi", "OKMK" va "Paxtakor" chempionlik uchun kurashishi mumkin.

Jadvalning quyi qismiga kelsak: Pro-liga va Superliga jamoalari o'rtasidagi farq ancha katta. Etibor bersak, jadvalning quyi qismida o'tgan yili Pro-ligada harakat qilgan jamoalarni ko'rish mumkin. Pro-ligadan keyin Superligada tez moslashish oson emas, bu vaqt talab qiladi. Ayni damda bazi jamoalar tarkibi Superliga uchun etarli darajada kuchli emas. Mening fikrimcha, futbolchi va murabbiylar buni to'g'ri qabul qiladi.

Ekspert fikri. Diyor Mirzaboev: "Andijon" ikki frontga tayyor emasdek ko'rindi, bazi jamoalar tarkibi Superliga uchun etarlicha kuchlimas"