Bugun Turkiyaning Istanbul shahridagi shifoxonada o'ng oyoq tizzasini operaciya qildirgan Eldorbek Suyunovning jarrohlik amaliyoti muvaffaqiyatli o'tdi.

Qayd etish kerakki, yaqindagina chap qo'li kichik panjasini sindirib olgan darvozabon jamoa mashg'ulotlariga qaytgach avvaldan bezovta qilib kelgan o'ng oyoq tizzasidagi og'riq qaytalangan. Shundan so'ng darvozabon mazkur jarohatdan to'liq forig' bo'lish maqsadida jarrohlik amaliyotini o'tkazishni maqul ko'rdi. Bir soat avval yakunlangan jarrohlik amaliyoti muvaffaqiyatli o'tdi.

Superliganing o'tgan mavsumdagi eng yaxshi kiperi bo'lgan Eldorbek Suyunov taxminan 1,5 oy ichida, aniqrog'i mart oyi boshlarida safga qaytishi kutilmoqda. Darvozabon "Paxtakor"ning OCHL pley-off bosqichidan o'rin olgan Iroqning "Eyr Fors" jamoasiga qarshi o'yinni o'tkazib yuboradi.

Eslatib o'tamiz, bundan avval 2015 yilgi mavsum yakunlanganidan so'ng Eldorbek Suyunov Moskvada chap oyoq tizzasini operaciya qildirgandi. Bu safar esa o'ng oyoq tizzasidagi jarohatidan to'liq forig' bo'ldi.

Eldorbek Suyunov muvaffaqiyatli operaciya qilindi