Бельгиялик мутахассис Марк Вильмотс терма жамоани тарк этганидан бери федерация янги мураббий тайинлагани йўқ. Бу эса мухлисларни хавотирга солмоқда.

Терма жамоанинг ЖЧ саралашдаги ҳолатини зўр деб бўлмайди, шу боис маҳаллий ОАВ зудлик билан мураббий топилмаса бош жамоа янада қийин аҳволда қолиши ҳақида бот-бот ёзмоқда.

Хусусан Tehrantimes.com сайти Эрон терма жамоасига ботир мураббий кераклиги ҳақида ёзиб, икки нафар номзодни келтириб ўтди. Энг асосий номзод сифатида Амир Галенои кўрсатилган. Лекин "Сепахон" ушбу мураббийни қўйиб юбормоқчи эмас, чунки исфаҳонликлар Осиё чемпионлар лигасида иштирок этишади.

Бундан ташқари Амир Галенои 2006-2008 йилда терма жамоани бошқарган, бироқ унинг қўл остида форслар ўзини кўрсата олмаган. Осиё Кубоги-2007да терма жамоа Жанубий Кореяга пенальтилар сериясида имкониятни бой бериб, ярим финалга чиқа олмаганди.

Терма жамоани бошқаришга яна бир номзод бу - Воҳид Хошемиян. Хошемиян Вильмотснинг ёрдамчиси бўлиб ишлаб келаётганди, шу боис ҳозирги муҳитни яхшироқ билади. Ўз пайтида моҳир ҳужумчи бўлган Хошемиян Германияда ўйнаган кезлари "B" ва "A" лицензиясини қўлга киритган, бироқ уни ҳали зўр мураббий деб бўлмайди.