2016 yil Toshkentda o'tgan futzal bo'yicha Osiyo chempionati yarim finalida Tailand bilan bahsda penaltilar seriyasida hal qiluvchi gollardan birini urgan Fahriddinov ko'p yillar davomida "Do'stlik-AIN" sharafini himoya qildi. Bu mavsumni u Toshkentning "Paxtakor" klubida boshladi. Biz dastlabki ikki tur o'tgach futzalchi bilan intervyu qilishga qaror qildik.

- "Paxtakor"ga o'tish qanday amalga oshdi?
- "Do'stlik-AIN" klubi bilan shartnomam tugagach "Paxtakor"dan taklif tushgach toshkentliklar safiga o'tishga rozi bo'ldim. Yangi mavsumga yangi jamoa safida yaxshi tayyorgarlik ko'rdik. Umid qilamanki "Paxtakor" safida katta yutuqlarni qo'lga kiritamiz.

- Sobiq klubingiznin keyingi taqdiri nima bo'ldi?
- "Do'stlik-AIN" jamoasining ko'plab futzalchilari turli klublarga o'tishdi va asosiy yosh o'yinchilar qoldi. Ushbu jamoa bu yildan "Nasaf"ga aylantirildi.

- Futzal bo'yicha O'zbekiston chempionati yangi formatga o'tdi. Bunga qanday qaraysiz?
- Qanday format bo'lsa ham bizning vazifamiz tushib futzal o'ynash. Oldinlari bitta tur bitta shaharda o'tkazilardi. Bu yildan esa har bir tur uy-safar tizimida o'tmoqda. Bir klub bilan ikki kun ichida ikki bor o'ynamoqda. Bu esa yurtimizda futzal muxlislarining ko'payishiga xizmat qiladi deb o'ylayman.

- "Paxtakor" futzal jamoasi haqida o'quvchilarimizga malumot bersangiz.
- "Paxtakor" tarkibi bu yil tajribali futbolchilardan tashkil topgan. Akmal Xazratqulov, Ravshan Eliboev, Dilshod Irsaliev, Maqsud Fayzullaev. Jamoadgi yosh futzalchilar bularga qarab o'sishadi va kelajakda terma jamoa darajasiga chiqishlari mumkin.

- Bosh murabbiy haqida nima deya olasiz?
- Ravshan Rajabov jamoa uchun jon kuydiradi. Tarkibdagi barcha yigitlar bilan yaxshi munosabatda, barchaga imkoniyat beradi.

- Klub rahbariyatining futzal jamoasiga etibori qanday?
- Klub rahbariyati futzal jamoasiga yaxshi sharoitlar yaratib bermoqda. Hech qanday kamchilik yo'q. Biz ham shunga yarasha yaxshi natijalarga erishib ularning ishonchini oqlashga harakat qilamiz.

- "Paxtakor"ning uy arenasi qaysi?
- Dastlabki uy o'yinimizni "Bunyodkor" zalida o'tkazdik. Bunga "Yoshlik" sport zali tayyor bo'lmagani uchun sabab bo'ldi. Keyingi turlardan uy uchrashuvlarini "Yoshlik"da o'tkazamiz.

- Mavsumni Buxoroda boshladingiz.
- Dastlabki turni mehmonda "Buxoro" bilan o'tkazdik. U erda biz ikki ochko yo'qotdik deb o'ylayman. Ammo mavsumdagi ilk uchrashuv bo'lgani, o'yinimiz u qadar qovushmagani uchun durang qayd etdik. Ertasi kuni ularni mag'lub etdik.

- Raqib haqida fikrlaringiz?
- "Buxoro" jamoasi yaxshi shakllangan jamoa. Sobiq "Kogon" klubi futzalchilari ayni paytda "Buxoro" sharafini himoya qilmoqda. Ular ko'plab klublarga bosh og'riq bo'la olishadi.

- "Buxoro"dan so'ng "Qo'qon-1912" bilan o'ynadinglar...
- Ha, ikkinchi turda "Qo'qon-1912"ni ikkala bahsda ham yirik 7:1 va 7:3 hisobida mag'lub etdik. Bu jamoa tarkibida futboldan futzalga o'tgan o'yinchilar ko'p ekan. Tajribali o'yinchilar ko'pchilikni tashkil etar ekan.

- Bu yilgi mavsumda qaysi klublar favorit deb o'ylaysiz?
- Superligada AGMK, "Metallurg", "Neftchi" va shu bilan birga "Paxtakor" klubi yuqori o'rinlar uchun kurash olib boradi deb o'ylayman.

- 3-turda vodiyga borasizlar...
- Ha to'g'ri. Keyingi turni Namanganda "Navbahor"ga qarshi o'tkazamiz. Raqibimiz yosh futzalchilardan tuzilganini bilamiz. Nasib qilsa Namangandan ikkita g'alaba bilan qaytishga urinamiz.

Narzulla Saydullaev suhbatlashdi

Feruz Fahriddinov: "Paxtakor" futzal jamoasi yuqori o'rinlar uchun kurashadi"