Qarshiliklar yangi mavsumga ham qizg'in tayyorgarlik olib bormoqdalar. Shu munosabat bilan jamoa bosh murabbiyi Xolbek Yo'ldoshevni suhbatga chorladik.

- Jamoa yangi mavsumga qay tarzda tayyorgarlik ko'rmoqda?
- Ayni paytda Qarshi shahrida yig'in o'tkazayapmiz, tayyorgarlik jarayonini ancha oldin boshlaganmiz. Iyul oyining ikkinchi yarmida Qarshida plyaj futboli bo'yicha VIII O'zbekiston Kubogi va O'zbekiston chempionati bahslari bo'lib o'tdi. Ana shu bellashuvlarda qatnashgan “Do'stlik-AIN” jamoasi har ikki turnirning finalida Qarshining boshqa bir jamoasi “Nasaf”ni mag'lub etib, o'ziga hos dubl qayd etdi. Sohil futboli musobaqalari o'z nihoyasiga etgach, futzal mavsumiga tayyorgarlikni boshlab yubordik.

- Tarkibda o'zgarishlar bormi?
- O'tgan mavsumda asosiy ustunlarimiz bo'lgan darvozabon Akmal Xazratqulov hamda hujumchimiz Alisher Ibragimovlarni jamoada olib qoldik, vaholanki, bu o'yinchilarga etarlicha takliflar tushgan edi. Lekin, bazi futzalchilarimizni qo'yib yubordik, Alisher Yusupov, Jasur O'runov va Baxtiyor Baratovlar “Kogon” tarkibiga borib qo'shilishdi. Ularga yangi jamoalarida omad tilab qolaman. Ketganlarni o'rnini to'ldirish uchun boshqa klublardan futzalchi sotib olmaymiz, balki maxalliy o'yinchilar jalb qilinadi.

- Moliyaviy muammolar bartaraf etilganmi?
- Afsuski, klub moliyaviy tomondan jiddiy muammoga duch kelgan, hozirgacha homiy topilgani yo'q. Bu yil ham harajatlarni o'z cho'ntagimdan ko'tarishimga to'g'ri keladi. Nasib qilsa, bu safar ham munosib ishtirok etamiz.

- Yig'in doirasida o'rtoqlik o'yinlari o'tkazilayaptimi?
- Yaqindagina “Kogon” jamoasi bilan Qarshida o'rtoqlik o'yini o'tkazdik va 5:2 hisobida g'alaba qozondik. Bundan tashqari, yana bir nechta klublar bilan nazorat uchrashuvi o'tkazishni mo'ljallaganmiz.

Tolibjon Qosimov suhbatlashdi

Futzal. Xolbek Yo'ldoshev: “Nasib qilsa, bu mavsum ham munosib ishtirok etamiz”