- G'iyosjon "Mashal" mavsumni durang bilan boshladi va o'tgan turda amaldagi chempionga imkoniyatni boy berib qo'ydi. Dastlab mana shu bo'lib o'tgan ikki uchrashuv haqida o'z fikrlaringizni bildirib o'tsangiz?

"So'g'diyona"ga qarshi o'yin bizga qiyin bo'ldi. So'nggi daqiqagacha g'alabaga ishongan edim. Omadsizlik tufayli gol o'tkazib yubordik va ikki ochkoni boy berdik deya olaman. "Bunyodkor"ga qarshi esa o'z o'yinimizni umuman ko'rsatish imkoni bo'lmadi. Amaldagi chempion bo'lgan taqdirda ham 70 daqiqagacha ustunlik borasida tenglik edi. O'tkazilgan gol esa ochiq o'yin ko'rsatishimiz kerakligini ko'rsatdi. Vabankda esa yana bitta gol o'tkazdik. Hozirda jamoaga kirishib ketdim va yaxshi o'yinlarimni ko'rsatishimga ishonaman.

- Navbatdagi turda jamoamiz sizning sobiq jamoaningizga qarshi bo'lib o'tadi. Bu borada aynan siz uchun ahamiyati boshqacha bo'lsa kerak?

Albatta men uchun "Andijon"ga qarshi maydonga chiqish sharaf. Maydonda bor imkoniyatimcha o'yin ko'rsatib "Mashal"ga foyda keltirishni istayman. "Andijon"da yaxshi xotiralar qolgan va Azamat Abduraimov katta futbolga olib kirdi. Men Azamat akani shogirdi sifatida ko'rsatmalariga amal qilaman. Har bir uchrashuvda barcha imkoniyatimizni jamoam manfati uchun ko'rsataman. Bu haqida Abduraimov ham aytib o'tgan. Ahamiyati haqiqatdan ham katta. "Andijon"da muxlislar bosimi o'yinga tasir ko'rsata oladi. Muxlislarga oddiygina aytsak gap yo'q.

- Aynan futbolga yani katta futbolga kirib kelishingiz borasida aytib o'tdingiz, Bu borada to'liqroq malumot bera olasizmi ?

Dastlab futbolga otam sababchilar. Otam dastlab Toshkent shahridagi Kadieshva futbol internat maktabiga olib borgan va shu erda futbolga kirib kelganman. Dastlabki murabbiyim esa Jamshid Abduraimov bo'ladi. Aynan shu inson tufayli futbolga katta qiziqishim ortgan. Undan keyin "Lokomotiv" yoshlar tarkibida maydonga tushdim. U erda Nizomiddin Nortojiev va Jamshid Abduraimovlar futbol tushunchalarini o'rgatdi. "Lokomotiv"ning asosiy tarkib uchrashuvlarida maydonga tushdim. Orada bir yil jarohat tufayli maydon tashqarisida o'tkazdim. So'ng "Oq-tepa" jamoasida yarim mavsum ishtirok etdim. Undan keyingi mavsumda Namanganning "Xotira-79" jamoasida amaliyotga ega bo'ldim. O'tgan mavsumda Azamat Abduraimov taklifiga ko'ra "Andijon" jamoasida to'p surdim. U erdagi ishtirokimdan qoniqdim. "Andijon" Oliy ligaga yo'l oldi va bunda barcha futbolchilarni hissasi bor.

- Navbatdagi mavsumdan nimalar kutmoqdasiz ?

Birinchi navbatda "Mashal" bilan Oliy ligada yuqori o'rinlar uchun harakat qilamiz. Har bir uchrashuvga faqat g'alaba uchun tushgan holda muxlislarimizni xursand qilishini maqsad qilganmiz. Ko'proq o'yin amaliyotiga ega bo'lgan holda O'zbekiston terma jamoasiga kirishga harakat qilamiz. Bu mening eng katta orzularimdan biri.

- Futboldan tashqari nimalarga qiziqasiz?

Ko'proq Evropa futboli o'yinlarini ko'rishni yaxshi ko'raman. Internet orqali xabarlar o'qiyman, oilam bilan birga bo'laman. Hozircha kitob o'qishga qiziqmayman. Evropadan "Real" klubi muhlisiman.

G'iyosjon Komilov: "Andijon"ga qarshi o'ynash men uchun sharaf"