Рўзиқул Бердиев биринчи навбатда жамоага ишончни қайтариши лозим. "Насаф" ўз гуруҳидаги энг кучли ва қийин баҳсни ўтказди. Қолган рақиблар билан бемалол футбол ўйнаса бўлади. Ўйнаганда ҳам ғалаба учун курашиш лозим.

Муҳими, Теҳрондаги мағлубиятдан тегишли хулосалар чиқарилиши керак. Ўша куни рақиб кучли эканлигию, улар айни ўйин тонусида бўлгани ҳақиқат. Шунчаки "Озоди"да "Персеполис" фонида довдираб қолган "Насаф"ни кўриш ишқибозларни ранжитди. Жамоа шу куни футбол ўйнолмади. Негадир кучли босимни жуда яқин ҳис этгани бутун учрашув давомида ўз таъсирини кўрсатиб турди. Айнан шу жиҳат "Насаф"ни мухлислар кўз ўнгида бегонага айлантириб қўйди. Биринчи турдаги "Насаф"нинг энг катта камчилиги - жамоа ўйин бошланишидан олдин ютқазиб қўйгандек таассурот қолдирди. Ўйлаймизки, бу камчиликлардан етарли хулоса чиқарилади ва қолган бешта ўйинда "Насаф" ҳақиқий "аждарҳо"га айланади.

Тўғри, таркибдаги беқарорлик, етакчилар кетиб қолганию ва бошқа бир қатор муаммолар Бердиевга режа бўйича янги мавсумга бир текисда тайёргарлик кўриш имкониятини бермади. Шунга қарамай, жамоа ОЧЛ гуруҳ босқичига чиқди. Мураббий айтганидек, биринчи вазифа уддаланди. Лекин бу юқори чўққига айланиб қолиши керак эмас. Аксинча айнан ушбу муваффақият жамоани иштаҳасини очиб юбориши лозим. Айтишадику, иштаҳа овқат пайтида келади деб.

"Персеполис"га қарши баҳс яна шуни аниқ ва тиниқ кўрсатдики, "Насаф"нинг ўйини умуман чиқмаётган ва футболчилар ҳаяжонланиб оддий хатоларга йўл қўяётган паллада жамоани "йиғиб олиш"да энг катта кўмакчи бўлиши лозим бўлган етакчи кўринмади. Ёки топилмади. Аввало бу нарса жамоа сардори Драган Черан зиммасига тушади. Лекин Чераннинг ўзи кераксиз паллада тўпни ўзида кўп сақлаб юбориш натижасида якунда рақибга тўпни топшириб қўйди. Ҳужумчи етакчилик хусусиятини айнан ОЧЛда кўрсата олмади. Бу борада Бердиев жамоанинг етакчисига айланган ҳужумчи билан алоҳида гаплашиб олиши зарурдек. Чунки жамоа ўйини асосан Черан атрофида қурилади ва бу каби катта баҳсларда Драганнинг ўйинига кўп нарса боғлиқ. Жамоадошлари айнан унга қараб ишонч билан тўп суришлари мумкин.

Азиз Ғаниев ва Одил Ҳамробеков бу йилдан сўзсиз етакчига айланишади. Аммо улар ҳали ОЧЛ даражасидаги ўйинларда "Насаф"ни ўз ортиларидан эргаштиришларига бироз эрта. Етакчилик масълуияти оғирроқ. Ҳамробеков ва Ғаниевга бу масъулиятни тўлиқ ўз гарданига олиш учун жорий мавсумда ОЧЛдаги мустақил иштирок катта мактаб бўлади. Рўзиқул Бердиев бу икки марказий ярим ҳимоячи билан ҳам алоҳида ишлаши керак. Чунки марказни, умуман ўйинни бошқарадиган жамоанинг таянчи ва дирижёрига кўп нарса боғлиқ. Бу икки футболчилар энди ёш ёки умидли ўйинчи сифатида эмас, балки ҳақиқий жамоа етакчиларидек ўзларини тутишлари лозим. Ҳамробеков ва Ғаниев ўйин жиҳатидан анча улғайишган. Энди майдондаги ҳаракат ва ҳар қандай ҳолатдан совуққонлик билан чиқиб кетиш бўйича ҳам улғайишлари зарур.

Бердиев шогирдлари ОЧЛдаги ўз майдонларида ўтган охирги 6 учрашувдан буён мағлубият нималигини билмай келишмоқда.

Энди гуруҳдаги ҳолат ва бўлажак рақиб билан ўйин ҳақида бевосита тўхталадиган бўлсам, "Ал Васл" ўзбек жамоалари учун янги рақиб. Бу жамоа илк бор ўзбек жамоаларига қарши тўқнаш келмоқда. Амирликлар айни пайтда ички чемпионатда учинчи поғонада боришмоқда. Яна шуни алоҳида қайд этиш мумкинки, жамоанинг ҳозирги бор эътибори айнан БАА лигасига қаратилган. Умуман олганда, "Ал Васл"да ОЧЛда иштирок этиш бўйича тажриба "Насаф"никидан юқори эмас.

«Ал Васл» Қаршига тўлиқ “қуролланган” ҳолда етиб келмаган. Жамоа тўпурари Фабио Лима жароҳати сабабли Қаршига олиб келинмаган. Аммо Каио “Ал Васл” билан Қаршига ташриф буюрган. Ушбу футболчи индивидуаль жиҳатдан анча юқори салоҳиятга эга. Умуман “Ал Васл” жамоасининг ҳужум чизиғи анча ўткир. Ҳимоя борасида эса илиқ сўзларни айтиш мушкул. “Насаф” эртага асосий эътиборни рақибнинг айнан ўша бўшлиғидан унумли фойдаланишга қаратиши лозим. Бердиев “Ал Васл”га ҳужумкор ўйинни таклиф этиши лозим.

Родолфо Арруабаррена ва Рўзиқул Бердиев таъкидлагандек, эртага “Марказий” стадионда ўтган турда мағлубият аламини татиб кўрган жамоалар ўзаро курашишади. Аламзадалар тўқнашувида кўп нарса руҳий тайёргарликка боғлиқ.

"Ал Васл" бош мураббийи Родолфо Арруабаррена кўпроқ 4-3-3 тактик схемасидан фойдаланишни хуш кўрадиган мутахассис. Бежизга жамоа ҳужумкор ўйин намойиш этмайди. Чунки мураббий танлаган услуб айнан ҳужумкор ўйинга мос схема. Эртага ҳам жамоа катта эҳтимол билан шу тактик схемада ўйнаши мумкин.

"Насаф" қандай услубни танлайди? Жамоа одатдаги услубини танлайдими ёки "Персеполис" билан ўйиндаги 3 марказий ҳимоячи билан ҳаракат қиладими? Теҳрондаги ўйин шуни кўрсатдики, жамоанинг ҳозирги ҳолати ушбу тактик схемада мукаммал ўйнаш учун тайёр эмасдек. Бу тактик схемада жамоанинг барча чизиқлари ўртасидаги боғлам йўқолгани кўриниб қолди. Эртанги баҳсда Бердиев бу тактик услубга мурожаат қилмаслиги ҳақиқатга яқин. "Ал Васл"га қарши ўйинда Бердиев жамоанинг одатий 4-2-3-1 схемаси танлаш эҳтимоли юқори. Таркибда ҳам баъзи ўзгаришлар бўлиши мумкин. Чап қанот ҳимоячиси ролида Шароф Муҳитдиновни эмас, балки Сайдулло Раҳматовни кўришимиз мумкин. Таркиб борасида бугунги жамоанинг ўйинолди расмий машғулотидан сўнг аниқроқ бир тўхтамга келиш мумкин. Бу ҳақда сал кейинроқ тўхталамиз.

“Насаф”нинг “Марказий” стадиондаги ғалабали серияси 9та ўйиндан буён давом этмоқда.

Қисқа қилиб айтганда, "Ал Васл" "Насаф" қўрқиши керак бўлган рақиб эмас. Аксинча, "Ал Васл" жамоаси "Насаф"ни олдида қалтираброқ туриши керак аслида. ОЧЛдаги иштирок ёки жамоанинг умумий пландаги ўйини жиҳатидан "аждарлар" "Ал Васл"дан устунроқ. Нега бу каби ишонч билан бундай деяпман? "Ал Васл" ўткир ҳужуми билан мақтана олса, "Насаф"да барча чизиқлар мувозанати тенг. "Насаф"нинг айнан бир чизиғи бошқасидан яққол кучсиз эмас. Биргина камчилик ва муаммоли тарафи шуки, бу захира торлиги.

"Ал Васл"нинг ҳимоядаги муаммолари эртанги баҳсда "аждарлар" учун ширин егуликка айланмоғи лозим. Оловни пуркаш пайти келганини "аждарлар"га ортиқча эслатиб ўтишга ҳожат йўқ, чамамда. "Насаф" ҳақиқий "аждарҳо"га айланадиган пайт келди.

Ҳақиқий "аждарҳо"ни кўрамизми?