Unda klubning sobiq futbolchi va tarbiyalanuvchilaridan biri, ortda qolgan mavsumda AGMK sharafini himoya qilgan Akrom Komilovning fikrlarini tingladik.

"Avvalambor taklif uchun xursand bo'ldim. Chunki "Bunyodkor"da oz emas, ko'p emas 10 yil to'p tepganman. Akademiya ochilganidan 2018 yilgacha shu klubni nonini edim. Qiyinchiliklari, yutuqlarida birga bo'lganmiz",- deydi Akrom Komilov.

- Joriy mavsumda AGMK so'nggi pallagacha ikkinchi o'rin va kubok uchun kurashda qatnashdi. Lekin yakunda uchinchi o'rin bilan kifoyalandi. Shunday ekan jamoa uchun mavsum qanday o'tdi?

- Jamoa o'zi ishtirok etgan musobaqalarda yaxshi harakat qildi. Ikkinchi o'rin uchun biz ko'proq munosib edik. Biroq oxirida omadimiz kelmadi.

- Klubingiz bilan shartnomangiz yakunlandi. Qishki transferlar vaqtida sizni boshqa jamoada ko'ramizmi yoki legionerga aylanish fursati keldimi?

- Hozirda bir nechta takliflar bor. Chunki AGMK bilan shartnomam nihoyasiga etdi. Xorijdan taklif kutyapman. Agentlar bu borada biroz kutishimni aytishdi. Shu bois hozir keyingi mavsumda qaerda o'ynashimni bilmayman.

Ikkinchi o'ringa ko'proq biz munosib edik yoxud AGMK himoyachisi xorijdan taklif kutyapti