- O'yin haqida

- Bugungi o'yinda qo'lga kiritilgan g'alaba bilan klub rahbariyatini, jamoa futbolchilari va muxlislarini tabriklayman. Bugundan "Istiqlol" stadioniga qo'yilgan diskvalifikaciya yakuniga etdi. Stadionga kelib qo'llab-quvvatlagan muxlislardan minnatdormiz. Bugungi g'alabani ularga bag'ishlaymiz.

Bugun yigitlar biz tanlagan o'yin uslubini alo darajada bajarishdi. Birinchi bo'limning 10-daqiqasida hisob 3:0 ko'rinishiga kelgandi. Shundan so'ng yarim himoya va himoya chizig'imiz ozgina bo'shashib qoldi. Shu sabab gol o'tkazib yubordik. Tanaffusda, kiyinish xonasida futbolchilar bilan bu borada gaplashdik. Yigitlarga rahmat aytaman, ular ikkinchi bo'limda faol harakat qilib, raqib darvozasiga yana 2 ta to'p kiritishning uddasidan chiqishdi.

- "Istiqlol" jamoasi bilan bo'lib o'tgan uchrashuv natijasi bekor qilindi. Bu xolatga munosabatingiz qanday? Shuningdek, ushbu jamoadan "Neftchi"ga jalb etilishi mumkin bo'lgan futbolchilar bormi?

- "Istiqlol" jamoasi 4 ta turdan so'ng musobaqani tark etdi, afsus. Ular bilan o'yinda 3 ochkoni qo'lga kiritgan edik, bu natija bekor qilindi. Boshqa choramiz yo'q, endi navbatdagi tur uchrashuvlariga jiddiy tayyorgarlik ko'ramiz. "Istiqlol" bilan qiyin o'yin bo'lgandi, yaxshi jamoa edi. Nega musobaqani tark etdi, hayronman. O'sha o'yinda qo'lga kiritilgan 3 ochkoni yo'qotdik, lekin bugun g'alaba qozonib, o'sha ochkolar o'rnini to'ldirdik. Bizda hozirda 25 nafar futbolchi bor, fikrimcha, ushbu futbolchilar bilan mavsumni yakunlaymiz. Avval ham aytganman, ikki nafar yosh futbolchini kuzatyapmiz. Ular terma jamoa azosi bo'lgan iqtidorli futbolchilar hisoblanishadi. Balki hammasi yaxshi ko'rinishda davom etsa, transferlar oynasi ochilgan vaqtda ularni tarkibga qo'shib olarmiz.

- Ko'pchilik muxlislar jamoa hujumchisi Otabek Zokirovning maydonga tushirilmayotgani sababi bilan qiziqishmoqda. Bunga qanday izox berasiz?

- Otabek Zokirov iqtidorli va yaxshi saviyadagi hujumchi hisoblanadi. Mavsum avvalida unda 2-3 jamoadan takliflar bor edi, qo'yib yuborganim yo'q. Hali chempionat uzun, oldinda Kubok bahslari ham bor. Albatta rotaciya qilib, keyingi o'yinlarda Zokirovga ham imkoniyat beramiz.

Ilhom Mo'minjonov: "Mavsumni qo'l ostimizdagi futbolchilar bilan yakunlaymiz"