"Bugungi o'yin qiyin bo'lishini bilardik. Jamoada ruhiy xolat bilan bog'liq muammolar bor edi, sababi oldingi ikki turda g'alaba qozonolmagan edik. Lekin bugungi o'yin uchun yigitlarga rahmat aytaman, ular bu uchrashuvda biz o'ylayotgan rejalarni amalga oshira olishdi.

O'yin bilan bog'liq yana bir omil bu maydon masalasi. Bugungi o'yinda suniy qoplamali stadionda o'yin o'tkazdik, bilasizmi bu uchrashuvga o'z tasirini ko'rsatmasdan qolmadi. Suniy qoplamali maydonda futbolchilarga erkin harakat qilishlari uchun qaysidir manoda cheklovlar bo'ladi.

O'yinimizda kamchiliklar bo'lishi mumkin, bunga etarlicha sabablar ham ko'p. Masalan "Turon" yosh jamoa, aksariyat futbolchilarni joriy mavsum avvalida, shuningdek mavsum davomida tarkibga jalb etdik. Bundan tashqari 3 turdan buyon 6 nafar asosiy tarkib o'yinchilarimizda jarohat bor edi, ularning xizmatlaridan foydalana olmadik. Shunday bo'lsa ham harakat qilyapmiz, intilyapmiz, har bir o'yinda g'alaba uchun maydonga chiqayapmiz.

"Istiqlol"ning musobaqadan chiqib ketishi haqida? Albatta, bu achinarli xolat. Bilasizmi, viloyat birinchiliklari, yani 2-ligaga jamoa qo'yishning o'zi katta mehnat talab etadi va o'ziga yarasha mashaqqatli. "Istiqlol" 4-5 yildan buyon shakllanib kelayotgan, bir qator yutuqlarga erishib kelayotgan edi. Bu klubda qanchadir insonlar mehnat qilardi. O'zbek futbolida xususiy klublar ko'paygani yaxshi deb o'ylayman.

"Xorazm" jamoasi haqida? Bu jamoa golga qadar bir qator imkoniyatlardan foydalana olmadi. Raqib jamoa haqida men gapirmaganim maqul, ularni o'zaro muhokama qiladigan murabbiylari bor. Shuni aytishim mumkinki, "Xorazm" menda yaxshi taasurot qoldirdi. Jamoaga hozircha g'alaba etishmayapti, bitta g'alabadan keyin ularda o'zlariga bo'lgan ishonch ortib ketadi" - deydi Ismoilov.

Islombek Ismoilov: "Olti nafar asosiy tarkib futbolchimizda jarohat bor"