Ўйиндан олдин фаворит сифатида фарғоналиклар тилга олинган бўлсада, якуний натижа "Машъал" фойдасига ҳал бўлди (1:0). Мазкур ўйин таассуротлари борасида жамоанинг тажрибали футболчиси Жамшид Ҳасановнинг фикрларини тингладик.

- "Нефтчи"га қарши учрашув натижасига нималар асос бўлди? Рақиб бу сафар ўз ўйинини топа олмадими ёки "Машъал"нинг тайёргарлиги ғалабага олиб келдими?

- "Нефтчи"да кучли жамоа жамланган. Лекин бу ҳаётда ҳамма нарса бўлиши мумкин. Имконсиз ишнинг ўзи йўқ. Биз меҳнат қилдик ва берилган кўрсматмаларни тўғри бажардик. Бу ғалаба сари етаклади.

- Асрор Алиқулов: “Бундай натижа ҳар доим ҳам ўхшайвермайди”, — деган эди. Сизнингча, битта ўйиндаги ютуқни қандай омиллар белгилайди — машғулотми, руҳиятми ёки бошқа бир жиҳатми?

- Албатта, тайёргарлик. Рақибнинг ўйин услубини ўргандик. "Нефтчи"дан келиб чиқиб тактика танланди. Битта ўйиндан иборат тўқнашувда кўпроқ диққатни йўқотмасликка ҳаракат қилдик.

- Ўтган мавсумларда Тожикистон чемпионатида тўп тепдингиз. Бу мавсум Ўзбекистон Суперлигасидаги иштирокингиз шахсан ўзингиз учун қандай кечмоқда?

- Тўғрисини айтганда ўйин амалиёти кам берилмоқда. Бу футболда бўлиб туради. Ўз имкониятимни кутаман. "Нефтчи" билан ўйиндаги каби имконият берилса максимал фойдаланаман.

- Амалдаги чемпион "Насаф" ва мамлакат кубоги соҳиби "Андижон" мусобақа билан хайрлашди. "Нефтчи" ҳам ортга қайтди. Ўзбекистон Кубогида ғолиб чиқиш учун фаворитлар кимлар?

- Асосий фаворит деб доим ўз жамоани айтаман ва бунга ишонаман. ОКМК билан Ўзбекистон Кубогида зафар қучганимизда ҳам жамоамга ишонганман ва меҳнат қилишдан тўхтамаганман.

Жамшид Ҳасанов: "Ўзбекистон Кубогини ким ютади? Мен учун "Машъал" фаворит"