Маълумки, Эрон миллий терма жамоасини октябрь ва ноябрда ЖЧ-2022 саралаш босқичидан ўрин олган ўта муҳим баҳслар кутмоқда. Баҳрайн ва Ироққа мағлуб бўлганидан сўнг бу жамоа бирмунча қийин аҳволда қолган ва гуруҳдан чиқиш учун қолган ўйинларнинг ҳаммасини ютишга тўғри келади.

Тўрт ойга яқин танаффусдан сўнг яна рестарт олган Эрон чемпионатини мураббий диққат билан кузатиб келмоқда. "Мен қайтганимдан бери бекор ўтирганим йўқ, - дейди Драган Скочич. - Чемпионат ўйинларига бориб бир қатор футболчиларни кузатяпман. Терма жамоага лойиқ футболчиларни ўрганишда давом этаман. Кузда бизни муҳим ўйинлар кутиб турибди. Гуруҳдан чиқиш учун Камбоджа, Гонконг, Баҳрайн ва Ироқни мағлуб этишимиз шарт".

51 ёшли мураббий ўз интервьюсида яна шундай деди: "Албатта, ҳозирги вазият яхши эмас. Бироқ келажакка умид билан қараяпмиз. Мен Эронда катта ишларни амалга оширишни хоҳлайман. Терма жамоа билан жаҳон чемпионатига чиқиш бош мақсадим ҳисобланади. Энг муҳими, футболчиларнинг кўзи ёниб турганини кўриш. Шундагина менинг ишим ҳам осонлашади. Катта ўйлайдиган пайт келди. Эрон Осиёда муҳим ўрин тутади, бу мамлакат учун жаҳон чемпионатига чиқиш нақадар муҳим эканини жуда яхши тушунаман. Мен ҳам шу мақсадда келганман".

ЖЧ-2022 саралаш. Драган Скочич: "Эронга қайтганимдан бери бекор ўтирганим йўқ"