"Навбатчи ўйинлар". "Нефтчи" Тошкентда очко йўқотади, "Оқтепа" Ғиждувонда...

Ўша материалнинг ёзилишига мухлисларнинг ўзбек футболида навбатчи ўйинлар кўплиги ҳақида фикрлари сабаб бўлганди. Бугун тур натижалаини тахмин қилиб, мақоладаги тахминлар ўзини қанчалик оқлаганини текширамиз.

"Бухоро"дан йирик ғалаба... → Х

Тур доирасидаги 1-ўйинда сенсация қайд этилди. Сафарда умуман очко ололмаган "Оқтепа" чемпионлик учун курашаётган "Бухоро" майдонида катта ҳисобда мағлуб бўлишини кутгандик. Ғиждувондаги ўйин ҳақида кўп гапирилди, якуний натижадан хабардорсиз.

Абдураимовнинг мағлубиятсиз юриши тугайди → +

Бу тахмин ўзини оқлади. Ҳаким Фузайлов бошчилигидаги "Динамо" Сирдарёда 3 очко ишлаб олди ва 2-ўринга кўтарилди.

"Арал Самали" сафардаги илк ғалабасини тантана қилади → +

"Шўртан" майдонида ўтган ўйин борасидаги тахмин ҳам ўзини оқлади. Нукус клуби сафар ўйинларидаги 1-ғалабасини қўлга киритиб, очколари сонини 9 тага етказиб олди.

"Нефтчи" марказий баҳсда очко йўқотади... → +

Мана шу фикр фарғоналик кўплаб мухлисларнинг норозилигини келтириб чиқарди ва манзилимиз ҳақоратли хатларга тўлиб. Мана, ўйин ўтди. Натижа эса ўртада...

Қўшимча: Журналистикада тахминлар, прогнозлар аниқ таҳлилга асосланади (олдинги материалда бўлгани каби). Қушларнинг учиши ёки расмларга эмас. Буни тушунмайдиган орамиздаги баъзи ақлли юртдошларимиздан озгина сабрли бўлишни сўраймиз.

Юқорида тур сенсация билан бошлангани ҳақида айтдик. Футболнинг жозибаси мана шундай кутилмаган натижаларга боғлиқ. Про лигани зерикарли, навбатчи ўйинларга бой деган юртдошларимизга турнирнинг ҳар турида сенсация(лар) содир бўлаётганини эслатиб ўтамиз.

Масалан, бугун "Жар" стадионида ўтказилган ўйинни олайлик. Суперлига даражасидаги тажрибали ўйинчилардан тузилган "Нефтчи"нинг 19 ёшли йигитчалардан тузилган "Олимпик"га енгилишини ким кутганди (албатта, мендан ташқари)? Ҳа, бу — сенсация. Бугун "Нефтчи" ютқазди, аммо футбол ва мухлислар ютди. Боиси шундаки, агар Фарғона клуби 3 очко олса, "Нефтчи" ва 4-ўриндаги "Олимпик" орасида 8 очколик тафоввут юзага келарди. Бу ўз-ўзидан интригани ўлдиради. Турнир жадвали ҳозир қуйидаги ҳолатда (кўриб, кўзинг қувонади):

Қаранг, 10-турдан кейин 1 ва 4-поғона ўртасида 2 очколик фарқ. Бунақаси охирги йилларда Суперлигада ҳам содир бўлмаётган эди. Хуллас, элита йўлланмаси учун кураш тақдири сўнгги турга қадар давом этадигандек. Энди айтинг, жозиба шумасми?

Жозиба керакми, Про лигага боринг!