Unga nisbatan fikrlar ikkiga bo'lingan: bir tomonda katta nom va piar imkoniyati, ikkinchi tarafda esa tajriba va natijalarning etishmasligi.

Afzal tomonlar

1. Katta nom va piar imkoniyati

Fabio Kannavaro - Jahon chempioni, “Yuventus” va “Real Madrid”da o'ynagan, “Oltin to'p” sohibi. Bu tarixda qolgan yutuqlar. Nom jihatidan u katta qiymatga ega. Buning orqali O'zbekiston jahon matbuotida, insayderlar va nashrlar sahifasida paydo bo'lishi tabiiy. Piar nuqtai nazaridan bu plyus. Biroq Marokash, uni boshqargan Valid Regragi misoli shundan dalolat beradiki, tabiiy natija suniy piardan ko'ra kuchliroq.

2. Osiyoda ish tajribasi

Kannavaro Osiyo futboliga chuqur kirib borgan: Xitoyda “Guanjou Evergrand”, “Tyanjin”, Xitoy terma jamoasi, shuningdek, BAAda “Al-Ahli”da ishlagan. Demak, u ham Sharq, ham G'arbiy Osiyo futboli haqida malum ko'nikmaga ega.

Salbiy jihatlar

1. Murabbiylikda omadsiz yo'l

Katta futbolchi sifatida tarixda qolgan Kannavaro murabbiylikda shu darajada muvaffaqiyatli emas. Raqamlar shundan dalolat beradi:

“Dinamo Zagreb” – 101 kun, 14 o'yin: 7 g'alaba, 2 durang, 5 mag'lubiyat.

“Udineze”– 47 kun, 6 o'yin: 2 g'alaba, 3 durang, 1 mag'lubiyat.

“Benevento” – 136 kun, 17 uchrashuv: 3 g'alaba, 7 durang, 7 mag'lubiyat.

Xitoy terma jamoasi – 2 o'yin, 2 mag'lubiyat (bittasi O'zbekistondan).

Murabbiylikdagi yagona yutug'i: "Guanchjou Evergrand" bilan Xitoy chempionligi (2019)

2. Qisqa vaqt omili

Jahon chempionatigacha bo'lgan muddat juda qisqa. FIFA kunlari bilan hisoblanganda, Kannavaro ixtiyorida bor-yo'g'i 30 kungina mavjud. Bu vaqt ichida u jamoaga uslub, tizim yoki yangi falsafa berishga ulgurmaydi.

3. Mentalitet muammosi

Agar u Vetnam yoki Gonkongda ish boshlaganida, madaniy yaqinlik sabab moslashuvi osonroq kechardi. O'zbekistonda esa mutlaqo boshqa muhit va bu unga qiyinchilik tug'dirishi mumkin.

4. O'FA rejasi va savollar

O'FA avvaldan xorijlik mutaxassis olib kelishni maqsad qilgandi: Bentu bilan muzokara qilindi, Bilich, Lyov, Terim, Ivankovich nomzodlari muhokama qilindi. Ammo vaqt o'tgan sari imkoniyatlar qisqarib, Kannavaro varianti ko'rib chiqildi.

Bunda eng muhim savollar qolayotir:

* U faqat Jahon chempionati uchun olib kelinadimi?

* Agar natija bo'lmasa, keyin yana Kapadzega qaytishimiz kerak bo'ladimi?

* Nega O'FA rahbariyati mundialdan keyin o'z loyihasi, rejasini bildirmadi?

* Kanavarro bilan rejalar bir yillikmi yoki uzoq istiqbolga qaratilganmi?

Ortiqcha xavotirlar

Kechuvda ot almashtirilmaydi. Savol: O'FA Kannavaro bilan qanday kelishuv qiladi va undan nimalarni kutadi? Biz faqat Jahon chempionati uchun olib kelyapmizmi? Kechirasiz-ku, Kannavaro sehrgar emaski, Katanec to'rt yilda erishgan natijani bir yildayoq takrorlay olsa.

Katanecning o'zi aytganidek, bu mundialda asosiy maqsad - zavq olish va tajriba to'plash. Agar natijasiz, sharmandali holatda qaytsak, Kannavaro ketadi, ammo yana Kapadzega iltijo qilishga to'g'ri keladimi?

Kapadze hech narsa yo'qotmaydi. U tarixga yozildi - ilk bor jamoani ham Olimpiada, ham Jahon chempionatiga olib chiqdi. Uning kelajagi ochiq: “Paxtakor” eshiklari uni kutyapti, bo'sh qolsa yana o'rganishda davom etadi.

Xulosa

Fabio Kannavaro - katta nom, katta futbol tarixi. Lekin murabbiy sifatida u hali o'zini ko'rsata olmagan. O'zbekiston uchun uning tayinlanishi piar nuqtai nazaridan qiziq, ammo amaldagi samarasi katta shubha ostida.

Bu qaror strategik rejami yoki vaqtinchalik tajriba? Savol ochiq.

Kannavaro tayinlovi: piarmi yoki strategik qaror?