Ушбу Осиё Кубогида кўпчилик Эрон терма жамоасидан чемпионликни кутаётганди. Лекин форслар мусобақанинг ярим финалида ўз юришларини тўхтатишди.

Эрон кеча кутилмаганда Японияга 0:3 ҳисобида имкониятни бой берди. Учрашувдан сўнг ўтказилган матбуот анжуманида жамоа устози Карлуш Кейруш хайрлашаётганини маълум қилди:

"Аввало шуни айтишим керак, жамоам билан фахрланаман. Эрон терма жамоасини узоқ вақт бошқардим, ҳаммаси фантастик даражада бўлди, футболчилар билан узун масофани босиб ўтдик".

"Бу ерга финалда ўйнаш учун келгандик, лекин бир қадам қолганда турнирни тарк этяпмиз. Шу ерда ҳамммаси тугайди. Мен қўлимдан келганча ишладим. Ортда қолган 8 йил мен учун жуда яхши ўтди. Шундай футболчиларни шуғуллантирганимдан бахтиёрман. Мен терма жамоанинг кейинги фаолиятида омад тилаб қоламан".

"Бугун фақат бир жамоа майдонда кўринди: бу эса Япония. Тан олишим керак, финалга энг яхши жамоа йўл олди. Мен Японияни финалга чиққани билан табриклайман. Лекин энг катта раҳматни ўз футболчиларимга айтаман. Улар қийин вазиятларда ҳам менга далда бўла олишди. Умримнинг қолган қисмида Эронда ўтказган вақтимни асло унутмайман. Барчангизга ташаккур".

Карлуш Кейрушнинг хайрлашув сўзлари