Mahdi Ali boshchiligidagi "Shabab" dastlabki uchta turning barchasida bir xil 1:1 hisobidagi duranglarni qayd etgandi. Kecha esa "Shabab" futbolchilari oldingi uchta o'yinning alamini "Garafa"dan olishdi - 8:2.

Quvonarlisi bu o'yinda o'zbekistonlik yarim himoyachi Azizjon G'aniev to'liq harakat qildi va "Al Garafa" darvozasiga urilgan 4ta golda ishtirok etdi.

Keling ushbu gollarni daqiqalar bo'yicha yodga olamiz:

41-daqiqada Azizjon G'aniev maydon markazida raqibdan to'pni olib qo'yib jamoasining hujumini boshlaydi va shu hujum Xarib Al Maazamining goli bilan tugaydi - 3:1.

50-daqiqada Tomas Olsenga nisbatan ishlatilgan qo'pollik uchun belgilangan jarima to'pini Azizjon G'aniev amalga oshiradi. To'p jonli devorda turgan futbolchining boshiga tegib darvozaga kirib ketadi - 4:1.

65-daqiqada "Al Garafa" burchak to'pini amalga oshiradi va "Shabab" futbolchilari qarshi hujumga o'tishadi. Qarshi hujumni G'aniev rivojlantiradi va ikki raqibdan qochib ketib to'pni Al Blushiga uzatadi. Umar Abdulrahmon bilan devor uslubida o'ynagan Al Blushi yakunda gol urdi - 6:2.

83-daqiqada "Shabab Al Ahli" yana bir jarima to'piga ega bo'ladi. Bu safar ham to'p yoniga hamyurtimiz keladi va ideal zarba bilan o'yinga yakuniy nuqtani qo'yadi - 8:2.

VIDEONI KO'RISH

Instat portali ushbu bahs uchun G'anievga 260 ball qo'ydi. Uchrashuvda faqatgina Tomas Olsen hamyurtimizdan ko'proq ball oldi. Norvegiyalik hujumchi o'yinda ikkita gol urdi va bitta golli pas berdi.

G'aniev uchrashuv davomida 2ta gol urishdan tashqari 1ta xavfli vaziyatga sabab bo'lgan pas berdi, 1ta kroos amalga oshirdi (100 foiz aniqlik), 7 marta to'pni raqiblardan olib qo'ydi, 3 marta dribling amalga oshirdi (67 foiz aniqlik).

Tunda Azizjon G'aniev va "Shabab Al Ahli" "Al Garafa"ni "ko'mib qo'yishdi"