Маҳди Али бошчилигидаги "Шабаб" дастлабки учта турнинг барчасида бир хил 1:1 ҳисобидаги дурангларни қайд этганди. Кеча эса "Шабаб" футболчилари олдинги учта ўйиннинг аламини "Гарафа"дан олишди - 8:2.
Қувонарлиси бу ўйинда ўзбекистонлик ярим ҳимоячи Азизжон Ғаниев тўлиқ ҳаракат қилди ва "Ал Гарафа" дарвозасига урилган 4та голда иштирок этди.
Келинг ушбу голларни дақиқалар бўйича ёдга оламиз:
41-дақиқада Азизжон Ғаниев майдон марказида рақибдан тўпни олиб қўйиб жамоасининг ҳужумини бошлайди ва шу ҳужум Хариб Ал Маазамининг голи билан тугайди - 3:1.
50-дақиқада Томас Ольсенга нисбатан ишлатилган қўполлик учун белгиланган жарима тўпини Азизжон Ғаниев амалга оширади. Тўп жонли деворда турган футболчининг бошига тегиб дарвозага кириб кетади - 4:1.
65-дақиқада "Ал Гарафа" бурчак тўпини амалга оширади ва "Шабаб" футболчилари қарши ҳужумга ўтишади. Қарши ҳужумни Ғаниев ривожлантиради ва икки рақибдан қочиб кетиб тўпни Ал Блушига узатади. Умар Абдулраҳмон билан девор услубида ўйнаган Ал Блуши якунда гол урди - 6:2.
83-дақиқада "Шабаб Ал Аҳли" яна бир жарима тўпига эга бўлади. Бу сафар ҳам тўп ёнига ҳамюртимиз келади ва идеал зарба билан ўйинга якуний нуқтани қўяди - 8:2.
Instat портали ушбу баҳс учун Ғаниевга 260 балл қўйди. Учрашувда фақатгина Томас Ольсен ҳамюртимиздан кўпроқ балл олди. Норвегиялик ҳужумчи ўйинда иккита гол урди ва битта голли пас берди.
Ғаниев учрашув давомида 2та гол уришдан ташқари 1та хавфли вазиятга сабаб бўлган пас берди, 1та кроос амалга оширди (100 фоиз аниқлик), 7 марта тўпни рақиблардан олиб қўйди, 3 марта дриблинг амалга оширди (67 фоиз аниқлик).
Изоҳлар