Endilikda qita futbol klublari yanvar oyidan boshlab aprel oyi so'ngiga qadar licenziyalash jarayonida ishtirok etadi.

Shundan kelib chiqib, Liga Superliga va Pro liga futbol klublarining licenziyalash menejerlari hamda buxgalterlari ishtirokida seminar o'tkazdi. Mazkur seminar Liganing Klublarni licenziyalash va xalqaro aloqalar bo'limi boshlig'i Zohirjon Akramxonov tomonidan olib borildi.

Seminar davomida licenziyalash jarayoni, unga kiritilgan o'zgarishlar, talablar masalasida futbol klublariga batafsil malumot berildi. So'nggi ikki mavsumdan buyon Liga licenziyalash harakatlarini monitoring qilibgina qolmay, futbol klublari bilan hamkorlikda mazkur jarayonda teng mehnat qilyapti. Buning natijasida bugungi kunga kelib O'zbekistonda OFK licenziyasiga ega chiqqan 12 ta futbol klubi hamda 2 ta ayollar jamoasi mavjud. Liganing navbatdagi maqsadi licenziyaga ega chiqayotgan klublar sonini yanada ko'paytirishga erishish hisoblanadi.

2020 yilgi mavsumga kelib Liga Pro liga qatnashchilarini ham licenziyalash jarayoniga jalb qilish tashabbusi bilan chiqdi. Buning natijasida 2021 yilga kelib Pro liganing 3 ta klubi OFK licenziyasini qo'lga kiritishga erishdi. Shu asosda Liga 2024 yildan boshlab Pro ligada faqatgina professional futbol klublari ishtirokini taminlash rejasi sari ilk qadamlarni tashladi.

2023 yilga kelib ilk marta Birinchi liga jamoasi ham licenziyalash jarayonida ishtirok etishi ko'zda tutilgan. Agar Birinchi liga jamoasi OFK licenziyasini qo'lga kirita olsa, 2023 yilgi mavsum natijasidan qati nazar 2024 yilda Pro liga qatnashchilari safiga qo'shiladi.

2023 yildan boshlab “Andijon SGS”, “G'ijduvon”, “Do'stlik Toshkent” kabi jamoalar ilk marta OFK licenziyasi uchun harakat qilib ko'radi. Shu tariqa licenziya talabgori bo'lgan futbol klublari soni 25 tani tashkil etishi rejalashtirilgan. “Yunired” va “Aral” futbol klublari tashkil etilganiga hali 2 yil to'lmagani munosabati bilan OFK licenziyalash jarayoniga 2024 yildan boshlab jalb qilinadi. Shu tariqa, mazkur klublar milliy licenziyalash talablari asosida xalqaro licenziya uchun tayyorlab boriladi. Pro ligada ishtirok etish huquqini qo'lga kiritgan “Navbahor-farm” esa “Navbahor lochinlari” qoshidagi jamoa sifatida licenziyalash jarayonida qatnashmaydi.

Malumot uchun, “Superliga va Pro liga reglamenti”ning 10.5-bandiga ko'ra OFK licenziyasini qo'lga kiritgan futbol klubiga O'FA tomonidan professional futbol klubi maqomi taqdim etiladi. Liga musobaqalarida ishtirok etayotgan qolgan barcha jamoa yarim professional futbol jamoasi hisoblanadi.

Klublar OFK licenziyasi uchun harakatga kirishdi