4 yanvar kuni Toshkentdan 10 nafar muxlis va 3 nafar jurnalist Malayziya poytaxti Kuala-Lumpur shahriga uchib keldi.

"Bunyodkor" muxlislar klubi boshlig'i Shavkat Imomov boshchiligidagi guruh Kuala-Lumpur shahridagi "Renaissance" mehmonxonasiga kelib joylashdi. Takidlash lozimki, Shavkat aka barcha tashkiliy masalalarni tezda va o'z o'rnida bitira oldi. Umid aka Maxmudov esa til borasida muammo bo'lmasligini taminladilar.

Mendan tashqari SPORT telekanali sharhlovchisi Murod aka Rizaev hamda "InterFutbol" gazetasi bosh muharriri Ahadxon Abduhamitov ham Avstraliyadagi Osiyo Kubogini yortish uchun yo'lga chiqdik.

Qanchalik uzoq bo'lmasin yashil qitadagi musobaqada terma jamoamizni qo'llab-quvvatlash uchun borayotgan muxlislarga qoyil qolmay iloji yo'q. Ularning shijoatiga ham gap yo'q. Hali bu azamatlar Avstraliya stadionlarida bayroqlaru, barabanlar bilan O'zbekiston terma jamoasini faqat olg'a boshlashadi!

Faoliyatim davomida birinchi bor xorijga safar qildim, faoliyatim emas umuman umrimda birinchi bor samalyotga chiqdim. Hayajon kuchli bo'ldi. 7 soatdan ortiq parvoz qildik. Futbolchilarga oson tutmanglar, shuncha vaqt bir joyda o'tirib ketish ham odamni yaxshigina sillasini quritar ekan. Lekin Kuala-Lumpur aeroportidan chiqishim bilan xuddi hammomga kirib qolgandek bo'ldim. Soat tungi 11 bo'lishiga qaramay havo juda issiq va dim edi. Kuala-Lumpur xalqaro aeroporti shahardan 75 kilometr uzoqda ekan. Maxsus "mini-bas" barchamizni 1 soat ichida mehmonxonaga eltib qo'ydi. Ko'chaga qarar ekanman dastlab mashinalar o'zi harakatlanayapti deb o'yladim, Malayziyada mashina haydovchilari o'ng tomonda o'tirishlarini eshitgandimu lekin o'zim ko'rmagandim, g'alati bo'lar ekan.

Safar taassurotlarim hozircha shulardan iborat. Oddiy yoki qisqa bo'lgan bo'lsa uzr so'rayman. Hayotida ilk bor o'zga yurtga safar qilgan har qanday odamda hayajon bo'ladi, shu hayajon ila yozilgan ilk kundaligim bo'ldi.

Ha aytgancha, qolgan guruh bugun tunda Toshkentdan Kuala-Lumpurga uchadi. Ular orasida saytimizning etakchi vakillari Nodirxo'ja Yuldashev va Xayrulla Xoliqov ham bor. Demak, ertaga ular safar taassurotlari bilan o'rtoqlashishadi.

Narzulla Saydullaev
Kuala-Lumpur

Kuala-Lumpurda yozilgan kundalik yoxud Osiyo Kubogiga "yurish" boshlandi