ROSSIYA
Moskvaning Lokomotiv klubi safida o'ynayotgan O'zbekiston milliy terma jamoasi himoyachisi Vitaliy Denisov, 3 noyabr kuni Premer-Liganing 15-turi doirasida safarda Spartak klubiga qarshi maydonga tushdi va to'liq 90 daqiqa to'p surdi. Mazkur uchrashuvda Lokomotiv 3:1 hisobida Spartak ustidan g'alaba qozongan va temiryo'lchilarning uchinchi goliga o'zbekistonlik futbolchi assistentlik qilgan.

Maxachqalaning Anji klubi o'z uchrashuvini 3 noyabr kuni o'z maydonida Ural klubiga qarshi o'tkazdi va 0:1 hisobida mag'lub bo'ldi. Anji safida O'zbekiston milliy terma jamoasi yarim himoyachisi Odil Ahmedov uchrashuvda to'liq 90 daqiqa harakat qilgan.

Rossiya Birinchi Divizioni vakili Orenburgning Gazovik klubi safida o'ynayotgan Sanjar Tursunov 3 noyabr kuni o'z maydonida Moskvaning Torpedo klubiga qarshi kechgan o'yinning 76-daqiqasida zahiradan maydonga tushirilgan. Uchrashuvda Torpedo 2:0 hisobida g'alaba qozongan.

QOZOG'ISTON
27 oktyabr kuni Qozog'iston premer-ligasida so'nggi 32-tur uchrashuvlari o'tkazildi. Etiborlisi, uch nafar o'zbekistonlik futbolchi - Aleksandr Geynrix, Temur Kapadze hamda Marat Bikmaevlar to'p suradigan Qozog'istonning Aktobe klubi 2013 yil mavsum yakuniga ko'ra Qozog'iston chempioni unvonini qo'lga kiritdi.

4 noyabr kuni o'z maydonida Ordabasi klubi bilan 2:2 hisobida durang o'ynagan Aktobe, Astana klubini 1 ochkoga ortda qoldirgan holda o'z tarixidia beshinchi marta mamlakat chempionligini qo'lga kiritdi. O'zbekiston milliy terma jamoasiga nomzod bo'lgan futbolchilar - Aleksandr Geynrix hamda Temur Kapadze hamd Marat Bikmaevlar chemponlik o'yinida asosiy tarkibda maydonga tushib, o'yin yakunigacha to'p surishdi.

Yana ikki nafar o'zbekistonlik futbolchilar - Ulug'bek Baqoev hamda Kamoliddin Murzoevlar to'p suradigan Pavlodarning Irtish jamoasi so'nggi tur o'yinida Qayrat klubiga 2:3 hisobida mag'lubiyatga uchradi va mavsumni 4-o'rinda yakunladi.

XITOY
4 noyabr kuni Xitoy Superligasida ham so'nggi, 30-tur o'yinlari bo'lib o'tdi va mamlakat chempionati yakuniga etdi. Superliganing so'nggi tur uchrashuvida Anzur Ismoilov (Changchun Yatay) hamda Shavkat Mullajonovlar (Liaoning) o'z jamoalari safida maydonga tushishmadi.
O'zbekiston milliy terma jamoasiga nomzod bo'lgan yana bir himoyachi, Egor Krimec to'p suradigan Beyjing Guoan klubi esa, Xitoy Superligasida mavsum yakuniga ko'ra bronza medallarini qo'lga kiritdi. Egor Krimec, so'nggi tur o'yinida o'z jamoasi qaydnomasiga kiritilgan bo'lsada, maydonga tushirilmadi.

JANUBIY KOREYA
3 noyabr kuni Janubiy Koreya K ligasi ikkinchi davra o'yinlarining 9-tur uchrashuvlari bo'lib o'tdi. Ikkinchi davradan boshlab K ligada 8-14 o'rinlar uchun kurashga kirishgan Seongnam Ilva Chunma klubi tarkibida O'zbekiston milliy terma jamoasi sardori Server Jeparov to'p surib kelmoqda. Tajribali yarim himoyachi 3 noyabr kuni o'z maydonida Geongnam klubiga qarshi asosiy tarkibda maydonga tushdi va Seongnamga g'alaba keltirgan golga mualliflik qildi.Seongnam 2:1 hisobidagi g'alabasi bilan yakuniga etgan o'yinda, Jeparov o'z jamoasining ikkinchi goliga mualliflik qildi.

OZARBAYJON
2 noyabr kuni Ozarbayjon premer-ligasida ham 12-tur o'yinlariga start berildi. O'zbekiston milliy terma jamoasi hujumchisi Bahodir Nasimov ushbu turda o'z maydonida Xazar klubiga qarshi o'yinda asosiy tarkibda maydonga tushdi Premer-Ligadagi o'zining navbatdagi golini kiritdi. 4:1 hisobida Neftchining g'alabasi bilan yakuniga etgan o'yinda Neftchining 3-goliga Nasimov 45-daqiqada mualliflik qildi.

QATAR
Ushbu mavsumdan boshlab, Qatar Yulduzlar Ligasi ishtirokchisi - Al Muayzir klubi sharafini himoya qilayotgan O'zbekiston milliy terma jamoasi yarim himoyachisi Fozil Musaev, 2 noyabr kuni o'z maydonida Al Arabi klubiga qarshi asosiy tarkibda maydonga tushdi. 1:0 hisobida Al Muayzir klubining g'alabasi bilan yakunlangan uchrashuvda Musaev to'liq 90 daqiqa o'ynadi.

BAA
BAA Chempionatida 23 noyabr kunigacha tanaffus elon qilingan. Xabaringiz bor, BAA Chempionati vakili, Dubayning Ash Shabob klubi safida O'zbekiston milliy terma jamoasi yarim himoyachisi Aziz Haydarov to'p suradi.

Legionerlar: Jeparovning goli Seongnamga g'alaba keltirdi