"Lukoil" homiyligi ostida o'tkazilgan bu festivalda "Lokomotiv" futbol maktabining to'rt xil yoshdagi guruhi ham ishtirok etib, yakunda sovrindor bo'lishdi.

Xususan "Lokomotiv-2003" chempionlikni qo'lga kiritgan bo'lsa, "Lokomotiv-2000", "Lokomotiv-2004" va "Lokomotiv-2006" uchinchi o'ringa ega chiqishdi. Ayni paytda 2000 va 2003 yillarda tug'ilgan futbolchilarimizga Alisher Bozorov, 2004 yilgi futbolchilarimizga Dilshod Otamuhammedov va 2006 yilda tug'ilgan tarbiyalanuvchilarimizga Sunnat Ro'ziev murabbiylik qilmoqda. Futbolchilarimiz Turkiyadan qaytib kelgach, "Lokomotiv" futbol maktabi direktori Erkin Saidovdan taassurotlar haqida so'radik.

- Bu musobaqa ananaviy tarzda har yil o'tkazib kelinadi. "Lukoil" kompaniyasining bolalar futbolini rivojlantirish bo'yicha o'z dasturi bor va shu dasturga muvofiq ular har yili bolalar o'rtasida festivallar tashkil etib turishadi. Bu yil barcha ishtirokchilar bitta mehmonxonada istiqomat qilishdi. Sharoitlar alo darajada bo'ldi. 2003 yilda tug'ilgan futbolchilarimiz o'tgan yil ham shu musobaqada qatnashib, ikkinchi o'rin bilan qaytgandik. Bu safar esa chempion bo'lish nasib etdi.

- Ammo gap bu erda natija ko'rsatishda emas. Chunki ketayotganimizda oldimizga hech kim vazifa qo'ygani yo'q. Maqsad - bolalarning dunyoqarashini shakllantirish bo'ldi. Mana shunday xalaqaro darajadagi musobaqalar qancha ko'p o'tkazilsa, bolalar uchun shuncha yaxshi. "Lokomotiv" futbolchilari tashkilotchilarda iliq taassurot qoldirishdi. Shu yilning iyun oyida "Lukoyl bolalar chempionlar ligasi"ning saralash bahslari o'tkaziladi. Bunga ham bizni taklif etishdi. Bundan tashqari, "Galatasaroy" futbol akademiyasiga ham ish o'rganish hamda tajriba almashish uchun taklif qilishdi. Umuman olganda, festival maktabimiz tarbiyalanuvchilari uchun har tomonlama foydali bo'ldi. Fursatdan foydalanib, bizga shunday sharoit yaratib bergani uchun klubimiz rahbariyati hamda homiylarga o'z minnatdorchiligimni bildirib qolaman.

"Lokomotiv": Erkin Saidovdan Turkiya safari taassurotlari