- O'yin haqida

- Bugun eng qiyin o'yinlardan birini o'tkazdik. Ikki jamoaga ham g'alaba suv va havodek zarur edi. Shu bois iloji boricha hujumkor o'yin ko'rsatishni rejalashtirgandik. Bor imkoniyatlardan unumli foydalana oldik, g'alabaga munosib edik deb o'ylayman.

"Surxon" so'nggi daqiqalarda yuqori pressing qo'lladi. O'sha vaziyatlarda bizga ayrim futbolchilarimizning yo'qligi sezildi. O'ylashimcha, bu raqib jamoa uchun qo'l keldi. O'tgan hafta juda qiynaldik. Chunki ko'plab yo'qotishlarimiz bor edi. Shunga qaramasdan, bir yoqadan bosh chiqarib o'ynadik va g'alaba qozondik. Futbolchilar, murabbiylar, jamoa rahbariyati va muxlislarni bu bilan tabriklayman! "Surxon" jamoasiga keyingi o'yinlarda omad!

- Odatda "Metallurg" ikki hujumchi va hujumchi ortida harakatlanadigan futbolchi bilan o'ynardi. Damir Temirov va Behruz Shodmonov jarohat olgani uchun bir nafar hujumchi va ikki nafar vinger bilan o'ynadingiz. Bugun qo'llagan yangi uslubingiz haqida nima deya olasiz? Keyinchalik ham foydalanasizmi?

- Kelajakda bu uslubda o'ynash yoki o'ynamaslik haqida hali o'ylab ko'rmadik. Lekin vaziyatdan kelib chiqib shu taktika asosida o'ynashga qaror qildik. O'ylashimcha, bu o'zini oqladi.

- Damir Temirov olgan jarohat qanchalik jiddiy?

- Damir Temirov jiddiy jarohat olgan. U 2 haftadan keyin safga qaytadi.

- O'tgan uchrashuvda Bektemir Abdumannonov debyut qilgandi, bugun esa Mirkomil Abdurazzoqov ilk marta maydonga tushdi. Yoshlar ishonchni oqlashyaptimi?

- Yozdan beri jamoani yoshartirish haqida o'ylab kelayotgandik. O'ylaymanki, rejamiz o'z mevasini beryapti. Akademiyada yoshlarni tayyorlab, jamoa uchun kerakli futbolchilarni etishtirib chiqarmoqchimiz.

Luisma Ernandes: "Bir yoqadan bosh chiqarib o'ynadik va g'alaba qozondik"