- Ўйин ҳақида фикрингиз?

- Ўйлайманки, бугунги ўйин мухлисларга ёқди. Мен доим бир гапни айтаман: биз мухлислар учун ўйнаймиз. Қизиқ учрашув гувоҳи бўлдик, еттита гол кўрдик, пенальти белгиланди, хавфли вазиятлар ҳам кўп бўлди. Битта ўйин учун буларнинг бари етарли деб ўйлайман. Лекин бундай учрашувларни ўтказиш мураббий учун осон эмас. Доим диққат бўласан, сочингга оқ тушади. Мухлислар эса маза қилади. Лекин барибир футболда энг муҳими - ишқибозларнинг хурсанд ҳолда уйга қайтиши.

- Усмонали Исмоналиев охирги ўйинларда олдинги чизиқда ҳаракат қиляпти. У ўзини қандай ҳис қиляпти?

- Ўйиндан олдин унга вингер сифатида фойдаланмоқчи эканимни айтгандим Лекин қўшимча сифатида ўйиндаги вазиятга қараб ўрта чизиққа ўтса бўлишини ҳам уқтиргандим. Майдон марказида Жўрақўзиев, Абдуманнопов, Исмоналиев - триоси бемалол жой алмашиб ўйнаши мумкин. Чунки уларнинг учаласи ҳам майдон маркази ёки қанотларда ўйнай олади. Шундай бўлдики, бугун Усмонали иккита гол урди ва бу билан жамоа ғалабасига ҳисса қўшди. Бунинг учун хурсандман.

- Суннатилло Ҳамиджоновда босим кўпдек кўриняпти.

- Мен унда қандайдир босим бор деб ўйламайман. Тўғри, бугун биринчи дақиқалардаёқ ўзини йўқотиб қўйди. Ўзи билан гаплашиб кўргач нима рўй берганини ўрганамиз. Лекин билишимча, унда ҳаммаси жойида бўлиши керак.

- Марказий ва қанот ҳимоячиларидан кўнглингиз тўлдими?

- Учта гол ўтказганимизни ҳисобга олсак, ҳимоячилар ўйинидан қониқдим дея олмайман. Аммо ҳеч кимни айбламоқчи эмасман. Чунки мен ҳар доим ҳамма ҳужум қилади ва ҳамма ҳимояланади деб айтаман. Бизда фалончи адашди, пистончи хато қилди деган гаплар йўқ. Футбол бу - жамоавий ўйин. Шуни айтишим мумкин, учала голни ҳам ўзимизга ўзимиз олиб келдик.

- Абдуғаниев билан Соҳибжонов нима учун U-21 жамоасига ўтказилди.

- Улар ўринбосарлар жамоасига бугун бориб қолгани йўқ. Ўзига яраша сабаблари борки, уларни U-21 жамоасига бердик. Бу машғулотдаги ҳолат билан боғлиқ. Уларни кузатяпмиз. Биласизми, асосий жамоада ўйнаш учун шунга ҳақли бўлиш керак. Бу бирданига рўй бериб қолмайди. Ўринбосарлардан кўплаб футболчиларни чақиряпмиз, уларни машғулотда синаб кўряпмиз. Кимни лойиқ кўрсак, асосий жамоада ўйнатамиз.

- Олег Зотеев билан Ислом Маматказин қачон ўйинга тайёр бўлади?

- Маматказин энди-энди индивидуал машғулотларни бошлади. Хайрият, унда ҳеч қандай муаммо йўқ. Зотеев эса алоҳида топшириқларни тугатиб, умумжамоа машғулотига қайтди. Балки у 22 октябрь кунги ўйинимизда захирада бўлиши мумкин.

Максим Шацких: "Мен доим бир гапни айтаман: биз мухлислар учун ўйнаймиз"