"Muborak tumanining sharafi va faxri bo'lgan "Mashal" futbol klubi 3 yillik tanaffusdan so'ng Superligada ishtirok etadigan bo'ldi. Bu qayta tiklanish jarayoniga klub bosh homiysi "O'zmilliybank" AJ katta hissa qo'shdi desak mubolag'a bo'lmasa kerak. Bank nafaqat futbolchilarni moliyaviy qo'llab-quvvatladi, balki infratuzilmani rivojlantirish yo'lida kamarbasta bo'ldi.

Bankning ko'magi orqali klub infratuzilmasi yaxshilash, Bahrom Vafoev nomidagi stadionning zamonaviy holatga keltirilishi, yosh iqtidorli futbolchilarni qo'llab-quvvatlash va ularga zarur sharoitlarni yaratish asosiy yo'nalishlardan biriga aylandi", - deb yozadi bank rasmiy sayti.

PFL rahbariyati ayni paytda Bahrom Vafoev nomidagi stadion Superliga talablariga javob bermasligini malum qildi. Asosiy kamchilik bu stadion chimi bilan bog'liq ekani hech kimga sir emas. Biroq "O'zmilliybank" yordamida "Mashal" tez fursatlarda barcha kamchiliklarni bartaraf etishi kutilmoqda. Sababi bu yil o'zining 33 yilligini nishonlayotgan O'zbekistonning eng tarixiy va baquvvat banklaridan biri uchun kichkinagina stadionning maysasini almashtirish hech qanday qiyinchilik tug'dirmasligi aniq.

Malumot uchun, Muborak klubi o'z tarixida O'zbekiston chempionati kumush medalini qo'lga kiritgan va mamlakat kubogi finaliga chiqqan. 2006 yil kichkinagina tuman jamoasi O'zbekiston sharafini Osiyo maydonlarida himoya qilgan. Osiyo chempionlar ligasi doirasida Saudiya Arabistonining "Al Hilol"dek klubi taslim etilgan.

Shaxsiy fikrimcha, "O'zmilliybank" yordamida "Mashal" 2025 yilda o'z tarixidagi eng yaxshi mavsumlardan birini o'tkazsa kerak. Sababi mazkur bankda futbolning haqiqiy fidoyilari faoliyat olib borishmoqda deb eshitdim. Buni rasmiy saytda chiqqan bayonotdan ham bilib olish qiyin emas. "Mashal" 2024 yilda "O'zmilliybank" logotipi tushirilgan formalarda o'ynadi va Pro liga g'olibi bo'ldi, yani klub ushbu brendni eng yuqoriga olib chiqa oldi. Endi qadam tashlash navbati bank tomonida qoldi.

"2025 yilda bankning say-harakatlari bilan jamoa Superligaga qaytibgina qolmay, chempionlik uchun kurash olib borishga tayyor. Bu nafaqat "Mashal", balki O'zbekiston futboli uchun ham katta yuksalish, o'sish bilan barobar.

Zero, "O'zmilliybank" "Mashal" timsolida o'zbek futbolida yangi davr boshlanishiga ishonch bildiradi", - deb yoziladi "O'zmilliybank" rasmiy saytida.

2025 yilda O'zbekiston Superligasida Qashqadaryo viloyatidan bir yo'la uchta klub ishtirok etadi. "O'zmilliybank"dek homiylar yordamida ommaviy va bolalar futboli rivojlanishi, yosh avlod sog'lom bo'lib tarbiya topishiga ishonchimiz komil.

"Mashal" Superligaga qaytibgina qolmay, chempionlik uchun kurash olib borishga tayyor!"