Portugaliyaning "Portu" klubi sharafini himoya qilayotgan futbolchi o'z intervyusida terma jamoa bosh murabbiyi Dragan Skochich nomiga iliq fikrlarni bildirdi.

"Hammamiz Dragan Skochichni yaxshi bilamiz. U Eronda bir necha yil ishlagan hamda futbolchilarni juda yaxshi biladi. Uning har bir o'yin uchun o'z rejasi bor, futbolchilar bilan dildan gaplashadi, jamoadan nima xohlayotganini uqtira oladi. Men murabbiy bilan gaplashganimda uning naqadar mehnatkash va rejali inson ekanini ko'rdim. O'ylashimcha, bu murabbiy bilan bemalol jahon chempionatiga chiqa olamiz. O'z navbatida men ham jamoa uchun borimni berishga tayyorman".

Dragan Skochich shu yilning fevral oyida bosh murabbiy etib tayinlanganidan beri forslar faqat bitta o'yinda maydonga tushishdi. Toshkentda O'zbekiston MTJ bilan kechgan bahsda 2:1 hisobida g'alaba qozonishdi va gollardan biri Taremi hisobiga yozildi.

Skochich murabbiylik faoliyati mobaynida Xorvatiya, Sloveniya, Quvayt va Saudiya Arabistonida ham ishlagan. U 2013 yildan beri Eronda mehnat qilib kelmoqda.

Mehdi Taremi: "Hozirgi murabbiy bilan jahon chempionatiga chiqa olamiz"