Португалиянинг "Порту" клуби шарафини ҳимоя қилаётган футболчи ўз интервьюсида терма жамоа бош мураббийи Драган Скочич номига илиқ фикрларни билдирди.

"Ҳаммамиз Драган Скочични яхши биламиз. У Эронда бир неча йил ишлаган ҳамда футболчиларни жуда яхши билади. Унинг ҳар бир ўйин учун ўз режаси бор, футболчилар билан дилдан гаплашади, жамоадан нима хоҳлаётганини уқтира олади. Мен мураббий билан гаплашганимда унинг нақадар меҳнаткаш ва режали инсон эканини кўрдим. Ўйлашимча, бу мураббий билан бемалол жаҳон чемпионатига чиқа оламиз. Ўз навбатида мен ҳам жамоа учун боримни беришга тайёрман".

Драган Скочич шу йилнинг февраль ойида бош мураббий этиб тайинланганидан бери форслар фақат битта ўйинда майдонга тушишди. Тошкентда Ўзбекистон МТЖ билан кечган баҳсда 2:1 ҳисобида ғалаба қозонишди ва голлардан бири Тареми ҳисобига ёзилди.

Скочич мураббийлик фаолияти мобайнида Хорватия, Словения, Қувайт ва Саудия Арабистонида ҳам ишлаган. У 2013 йилдан бери Эронда меҳнат қилиб келмоқда.

Меҳди Тареми: "Ҳозирги мураббий билан жаҳон чемпионатига чиқа оламиз"