- Birinchi navbatda uzoq davom etgan va murakkab o'tgan mavsum yaxshi notada tugagani bilan barchani tabriklayman. Mavsum uchun barchaga rahmat aytaman. Jamoamiz uchun mehnat qilgan qorovuldan boshlab toki rahbariyatga qadar minnatdorchilik bildiraman. Eng muhimi, doim bizni qo'llab-quvvatlab, kerakli pallada AGMKga dalda bo'lgan muxlislarimizga ming rahmat aytaman. O'tgan mavsum jamoamiz ko'ngilgagidek ishtirok etolmaganiga qaramasdan, bizga ishongan va doim elkadosh bo'lgan hammaga tashakkur. Uchinchi o'rin AGMK tarixida kichik bir yangi sahifa. Qadam va qadam ishlashdan to'xtamaymiz va yanada o'sishga harakat qilamiz. Pandemiya munosabati bilan joriy mavsum har doimgidanda qiyin kechdi. Jamoamiz mavsum davomida koronavirus kasalligini ham boshdan o'tkazdi. Shunga qaramasdan tinmasdan mehnat qilgan va maydonga chiqib borini bergan futbolchilarimga rahmat aytmoqchiman. Ha, mavsum davomida o'yinimizda pasayishlar yuzaga keldi. Ikkinchi o'rinni qo'lga kiritish imkoniyati ham tug'ilgandi, biroq bazi o'yinlardagi muvaffaqiyatsizliklar yakunda kumush medaliga ega chiqishimizga to'sqinlik qildi. Raqobatchilarimizga ikkinchi davrada mag'lubiyatga uchraganimiz qimmatga tushdi. Birinchi davrani mag'lubiyatsiz o'tkazganimiz ham AGMK jamoasi tarixidagi kichik bir yoqimli statistika. Bu albatta futbolchilar va menga doim yordam berib kelgan murabbiylar shtabining mehnati.

Yana bir bor barchaga minnatdorchilik bildirib, bizga ishongan rahbariyatga rahmat aytaman. Garchi chempionat tugagan bo'lsada, mavsum hali jamoamiz uchun yakunlangani yo'q. Hayot davom etadi. Chunki bizni seshanba kuni O'zbekiston kubogi doirasidagi "Lokomotiv"ga qarshi muhim bahs kutmoqda. O'zbekiston kubogini qo'lga kiritish vazifasini hech kim bekor qilgani yo'q. Bronza medali bu endi tarix. Biz hali yana ishlashda davom etamiz. Qisqa vaqt ichida koncentraciyani O'zbekiston kubogiga qaratamiz. 20 dekabr kuni O'zbekiston kubogi finali Namanganda o'tadi. Maqsad o'sha kuni Namanganda bosh sovrin uchun kurashda ishtirok etish", - deydi Qosimov.

Mirjalol Qosimov: "Bronza medali endi tarixga aylandi. Navbat O'zbekiston kubogiga"